قىزىلوردا وبلىستىق ءماسليحات سەسسياسىندا ق ر ۇكىمەتىنىڭ جانىنداعى رەسپۋبليكالىق ونوماستيكا كوميسسياسىنىڭ قاراۋىنا قىزىلوردا وبلىسىنىڭ ءبىلىم بەرۋ جانە مادەنيەت ۇيىمدارىنا اتاۋ بەرۋ جونىندەگى ۇسىنىستار قارالدى.
وبلىستىق قوعامدىق دامۋ باسقارماسىنىڭ باسشىسى ميرا قازبەكوۆا ءماسليحات دەپۋتاتتارىنا وسى كۇنگە دەيىن وڭىرلىك ونوماستيكا كوميسسياسىنىڭ وتىرىستارىندا قولداۋ تاپقان ءتيىستى باسقارمالاردىڭ ۇسىنىسىن جەتكىزدى.
اتاپ ايتقاندا، قىزىلوردا وبلىستىق فيلارمونياسىنا كومپوزيتور كەڭەس دۇيسەكەيەۆتىڭ ەسىمىن بەرۋگە قولداۋ ءبىلدىرىلدى. اتالعان باستاما الداعى ۋاقىتتا رەسپۋبليكالىق ونوماستيكا كوميسسياسى قاراۋىنا ۇسىنىلادى.
كەڭەس دۇيسەكەيەۆ – قازاقستاننىڭ ەڭبەك سىڭىرگەن ونەر قايراتكەرى. ونەر جولىندا 200-دەن استام شىعارما جازدى. ونىڭ ىشىندە «تولعاۋ» سيمفونياسى، «ءجالاڭتوس باتىر» سيمفونيا پوەما-كارتيناسى، «و، دۇنيە» كانتاتاسىنىڭ، «جىل مەزگىلدەرى» رومانستار سيكلىنىڭ اۆتورى بولدى.
«گۇلدەر» ءانسامبلىنىڭ، «قازاقكونسەرت» گاسترولدىك-كونسەرت بىرلەستىگىنىڭ مۋزىكا جەتەكشىسى، كوركەمدىك جەتەكشىسى، «قازاق تەلەديدارى» مۋزىكا رەداكسياسىنىڭ باس رەداكتورى، قازاقستان مەملەكەتتىك تەلەراديو كوميتەتى ەسترادالىق-سيمفونيا وركەسترىنىڭ كوركەمدىك جەتەكشىسى جانە باس ديريجەرى قىزمەتتەرىن اتقاردى.
