ارال-سىرداريا باسسەيندىك ينسپەكسياسىنىڭ ماماندارى قىزىلوردا وبلىسىنداعى سۋ نىساندارىن تەكسەردى. ناتيجەسىندە قىزىلوزەك اۋىلدىق وكرۋگى اۋماعىنداعى سىرداريا وزەنىنىڭ قاراوزەك تارماعىنان ءوز بەتىنشە سۋ تارتۋمەن اينالىسقان 13 زاڭسىز سورعى قوندىرعىسى انىقتالدى،- دەپ حابارلايدى Dalanews.kz
قازىرگى ۋاقىتتا قۇقىق قورعاۋ ورگاندارىمەن بىرلەسىپ، بۇزۋشىلىققا جول بەرگەن تۇلعالاردى انىقتاۋ جانە ولاردى اكىمشىلىك جاۋاپكەرشىلىككە تارتۋ جۇمىستارى جۇرگىزىلىپ جاتىر.
بۇعان دەيىن قىزىلوردا وبلىسىندا التى شارۋا قوجالىعىنىڭ 2،3 ملن تەكشە مەتردەن استام سۋدى زاڭسىز پايدالانعانى بەلگىلى بولعان ەدى.
سونداي-اق ارال-سىرداريا باسسەيندىك ينسپەكسياسى ماماندارى شاردارا اۋداندىق پروكۋراتۋراسىمەن بىرلەسىپ، تۇركىستان وبلىسىندا 24 تىركەلمەگەن سورعى قوندىرعىسىن انىقتادى. ال جايىق-كاسپيي باسسەيندىك ينسپەكسياسى اقتوبە وبلىسىندا 5 كاسىپورىننىڭ سۋدى زاڭسىز پايدالانعانى جونىندە دەرەك تىركەدى.
«سۋدىڭ «كولەڭكەلى نارىعىنا» قارسى جۇمىستار جالعاسادى. زاڭ بۇزعاندار مىندەتتى تۇردە انىقتالىپ، جاۋاپقا تارتىلادى. بۇدان بولەك، ەل بويىنشا باسسەيندىك ينسپەكسيا ماماندارى شارۋالارمەن جانە باسقا دا سۋ پايدالانۋشىلارعا سۋدى زاڭسىز تارتىپ الۋعا جول بەرمەۋ تۋرالى ءتۇسىندىرۋ جۇمىستارىن جۇرگىزىپ جاتىر»،– دەدى سۋ رەسۋرستارى جانە يرريگاسيا ءبىرىنشى ۆيسە-مينيسترى نۇرلان الدامجاروۆ.
