وبلىستىق پروكۋراتۋرا الاياقتىق قىلمىستارىنىڭ الدىن الۋ ءۇشىن "IT تERGEU" جوباسىن ازىرلەدى. ولاردىڭ مالىمەتىنشە، بۇل جوبا جاساندى ينتەللەكتتىڭ مۇمكىندىكتەرىن سوت-تەرگەۋ تاجىريبەسىندە ءتيىمدى قولدانۋعا باعىتتالعان، دەپ حابارلايدى Dalanews.kz.

جوباعا وبلىستىق بيۋدجەتتەن 85 ملن تەڭگە بولىنگەن.

"باعدارلاما كومەگىمەن 749 قىلمىستىق ءىس بويىنشا 1074 ۇيالى تەلەفون ءنومىرى تەكسەرىلدى. ناتيجەسىندە 151 قىلمىس دەرەگى اشىلىپ، 62 كۇدىكتى ۇستالدى، سونداي-اق 2 كيبەرقىلمىستىق توپ، 52 دروپپەر مەن حابار-وشارسىز كەتكەن 91 ادام تابىلدى"، — دەيدى ۆەدومستۆو.

قازىرگى ۋاقىتتا ينتەرنەت الاياقتىق بويىنشا 264 قىلمىستىق ءىستىڭ 78ء-ى سوتقا جولدانىپ، كورسەتكىش 29%-كە ارتتى.

"بانكتەر مەن ميكروقارجى ۇيىمدارىنا قاتىستى 52 ءىستىڭ كۇماندى ەسەپشوت ترانزاكسيالارىن توقتاتۋ ءۇشىن انتي-فرود ورتالىعىنا سۇرانىس جولداندى"، — دەيدى پروكۋراتۋرا.

ەسكە سالايىق، بۇعان دەيىن قازاقستاندا اكىمدەرگە وڭىرلەردەگى الەۋمەتتىك ماسەلەلەردى شەشۋگە كومەك كورسەتۋ ءۇشىن جاساندى ينتەللەكت (جي) تەحنولوگياسىن ەنگىزۋ جوسپارلانىپ جاتقانى تۋرالى جازعان ەدىك.

Informburo.kz مالىمەتىنشە، بۇل باستاما “وتباسىنىڭ سيفرلىق كارتاسى” جوباسى اياسىندا جۇزەگە اسىرىلماق.

ەڭبەك جانە حالىقتى الەۋمەتتىك قورعاۋ ءمينيسترى سۆەتلانا جاقىپوۆانىڭ ايتۋىنشا، بۇل باعدارلاماعا ءقازىردىڭ وزىندە 6 ميلليوننان استام وتباسىنىڭ دەرەكتەرى ەنگىزىلگەن.

“ازاماتتاردىڭ وتىنىشتەرى مەن اقپاراتتارى اۋقىمدى دەرەكتەر بازاسىنا بىرىكتىرىلەدى. وسى دەرەكتەر نەگىزىندە جاساندى ينتەللەكت وڭىرلەردەگى الەۋمەتتىك ماسەلەلەر بويىنشا تالداۋ جاساپ، شەشۋ جولدارىن ۇسىنا الادى”، – دەلىنگەن حابارلامادا.

ءوز كەزەگىندە پرەمەر-مينيستر ولجاس بەكتەنوۆ اكىمدەرگە جي قولدانۋ جونىندە ۇسىنىستار بەردى.

“وزەكتى اقپاراتتاردى اپتا سايىن اۆتوماتتى تۇردە جىبەرىپ وتىرۋ قاجەت. ءار اكىم جۇمىس ورنىندا وتىرىپ، ءوز وڭىرىندەگى ماسەلەلەردى كورىپ، تالداي الۋى ءتيىس. بۇل ءجي-دىڭ ناقتى پايداسى – قولمەن جاسالعان تالداۋ كوپ ۋاقىت پەن رەسۋرس تالاپ ەتەدى، ال جي ونى جىلدام ورىندايدى. ونى “ينتەللەكت” دەپ اتايدى، بۇل دا “ادام” سەكىلدى، تەك جىلدام جۇمىس ىستەيدى”، – دەپ اتاپ ءوتتى بەكتەنوۆ.

ايتا كەتەيىك، بيىل اقپان ايىنىڭ باسىندا ۇكىمەتتىڭ كەڭەيتىلگەن وتىرىسىندا پرەزيدەنت قاسىم-جومارت توقايەۆ قازاقستاندا جي دامىتۋ تۇجىرىمداماسىن جۇزەگە اسىرۋدى تاپسىرعان بولاتىن.

شىلدە ايىندا قازاقستان ۇكىمەتى جاساندى ينتەللەكت تەحنولوگياسىن ەكونوميكانىڭ ءتۇرلى سالالارىنا ەنگىزۋ جونىندە ستراتەگيالىق قۇجات قابىلدادى. ساراپشىلاردىڭ ايتۋىنشا، جي قولدانۋ 2030 جىلعا قاراي جاھاندىق ءجىو-دى 14%-عا ارتتىرۋعا مۇمكىندىك بەرەدى.

سونىمەن قاتار ۇكىمەت ءجي-دى ەنگىزۋدىڭ باسىم سەكتورلارىن انىقتادى. ولار:

• مەملەكەتتىك باسقارۋ؛

• مۇناي-گاز، تاۋ-كەن، ەنەرگەتيكا، كولىك جانە لوگيستيكا سالالارىنداعى تابيعي مونوپوليا سۋبەكتىلەرى؛

• سۋ رەسۋرستارىن باسقارۋ جانە اۋىل شارۋاشىلىعى.