وننان استام كىتاپتىڭ اۆتورى، ماكەدونيا، تۇركيا، ءازىربايجان ەلدەرىندە وتكەن «بۇكىل تۇركى دۇنيەسى» اقىندار فەستيۆالىنىڭ لاۋرەاتى، «قۇرمەت» وردەنىنىڭ يەگەرى باۋىرجان جاقىپ قارا ولەڭنىڭ قۇدىرەتىن وزگە ەلدەرگە مويىنداتقان تالانت يەسى. وزىندىك ولەڭ ورنەگىمەن دارالانعان اقىننىڭ ولەڭدەرى ورىس، بەلارۋس، اعىلشىن، ۋكراين، جۇڭگو، تۇرىك، ماكەدون جانە قىرعىز تىلدەرىنە اۋدارىلعان.
اقىن شىعارمالارىنىڭ دەنى فيلوسوفيالىق يىرىمدەرگە تولى، تۋعان ەلدىڭ سۇلۋ تابيعاتىن سۋرەتتەيتىن، ۇلتتىق بوياۋى قانىق ليريكالىق ولەڭدەر. ونىڭ «استانامەن سىرلاسۋ» اتتى جىر توپتاماسى، «تاۋەلسىز قازاقستانىم!»، «قازاق جولى»، «1991 جىل» جانە ت.ب. وسى سىندى ەل ەگەمەندىگىنە، تاۋەلسىز قازاقستاننىڭ وتكەن تاعدىر تالايى مەن بۇگىنگى بيىك مۇراتتارىنا ارناعان ولەڭدەرىنىڭ ءوزى ءبىر توبە. سىرشىل اقىننىڭ بۇكىل قازاق دالاسىن جىلاتقان سەمەي پوليگونىنىڭ قاسىرەتىن الەمگە ەستىرتكەن «جان داۋاسى» پوەماسى شوقتىعى بيىك شىعارمالارىنىڭ ءبىرى. قىرىق جىل سىنعا تۇسسە دە قاسيەتىن جوعالتپاعان، جاسامپاز، كيەلى اباي جەرىنىڭ تۋماسىنىڭ بۇل تۋىندىسىنداعى: «جەل جىلار، قاڭباق قاشىپ قىراتتاردان،
تارتىلىپ تالاي ءمولدىر بۇلاق قالعان.
جەتپىس جىل جەتىمسىرەپ ءومىر ءسۇرىپ،
قىرىق جىل قىرىلدىق ءبىز سىناقتاردان»، – دەگەن ولەڭ جولدارىنان ۇلتىمىزدىڭ تاۋەلسىزدىك جولىنداعى تار جول، تايعاق كەشۋى تۇگەل سىيىپ تۇرعانداي دەسەك ارتىق ايتقاندىعىمىز ەمەس. بۇل شىعارمادان سونىمەن بىرگە سەمەي قاسىرەتى، ەل ازابى، تۋعان جەردىڭ تۋلاقتاي كەۋىپ، بورداي ۇگىلىپ جاتقان كۇيى سول جەردىڭ پەرزەنتى رەتىندە جۇرەگىمەن سەزىنگەن اقىننىڭ اششى زارىن كورۋگە بولادى. بۇل داستاننىڭ قاي تاراۋىن وقىساڭىز دا جانىڭ شۇبەرەككە ءتۇيىلىپ، ەت-باۋىرىڭ ەزىلىپ، ساي-سۇيەگىڭ سىرقىرايدى.
كەشتە قىزدار ۋنيۆەرسيتەتىنىڭ اقىنجاندى قىزدارىنىڭ ورىنداۋىندا اقىننىڭ وسى ءبىر بۇكىل جەردىڭ، بۇكىل ەلدىڭ قاسىرەتىنە ارناپ شىعارعان «جان داۋاسى» پوەماسىنا ارنالعان تەاترلاندىرىلعان قويىلىم كورسەتىلىپ، ەل ەگەمەندىگىنە ارنالعان ولەڭدەرى وقىلدى. قىزدار «دەگەلەڭ تاۋىنىڭ زارى»، «جاپىراقتار جىرى»، «قۋراعان توعايدىڭ سوڭعى مۇڭى»، «بوزا دالانىڭ مۇڭى»، «تارتىلعان وزەننىڭ مۇڭى»، «جەلدىڭ جوقتاۋى» اتتى داستان جولدارىنداعى ۇزىندىلەرمەن تابيعات داۋىسىن ادامزاتقا اسەرلى جەتكىزە ءبىلدى. پوەزيالىق كەشتە سونىمەن قاتار، اقىن قۇرمەتىنە ارنالعان ارناۋ ولەڭ وقىلىپ، اقىننىڭ سوزىنە جازىلعان «تۇعىر»، «ەگەمەن ەلىم» اندەرى شىرقالدى.
كەش بارىسىندا باۋىرجان جاقىپ ءوزىنىڭ قازاق رۋحىنىڭ تابيعاتى مەن تاعدىرىنا ورىلگەن «دومبىرا»، «تامىزدىڭ 29-ى»، ەلىمىزدىڭ ەگەمەندىگىنە ارنالعان «مەنىڭ قازاقستانىم!»، ءتولقۇجاتىنا اينالعان «قولتاڭبا» ولەڭدەرىن جانە ت.ب. جاستاردى وتانسۇيگىشتىك، پاتريوتتىق سەزىمگە بولەيتىن ءبىرتالاي شىعارمالارىن وقىپ جىردان شاشۋ شاشتى. كەش سوڭىندا اقىن تولاسسىز قويىلعان جاستاردىڭ ولەڭ، پوەزيا، ماحاببات، ەل رۋحانياتى، قازاق قىزى تاقىرىپتارىنا ارنالعان سۇراقتارىنا جاۋاپ بەرىپ، قىزداردىڭ قارا شاڭىراعىنا بىرنەشە كىتابىن تارتۋ ەتىپ، اق تىلەگىن ارنادى.
«قىزدار ۋنيۆەرسيتەتى تاربيەنىڭ، تاعىلىمنىڭ، ءبىلىمنىڭ وشاعى. مەن ءۇشىن سانالى، پاراساتتى، ءبىلىمدى قىزدارمەن قاۋىشۋ، پىكىرلەرىڭىزدى ءبىلىپ، ۇندەرىڭىزدى ەستۋ، سىرلى-سۇحبات قۇرۋ ەرەكشە عانيبەت، ۇلكەن باقىت. بۇگىن مەنىڭ ومىرىمدە ەستە قالارلىقتاي كۇن بولدى. كەرەمەت مازمۇندى كەشتى ۇيىمداستىرۋشىلارعا مىڭ العىس. ەرەكشە اسەر الدىم. بۇل قاسيەتتى شاڭىراقتىڭ ءبىز ءۇشىن ورنى ءارقاشان بولەك. قاراكوز قارىنداستارىمنىڭ بىلىكتى دە ءبىلىمدى مامان، شاڭىراقتىڭ تۇتقاسى، كەرەگەسىنىڭ بەرىك بولۋى ءۇشىن قىزمەت ەتەتىن ۇلت تاربيەشىلەرى بولاتىنىنا سەنەمىن. ءارقايسىمىز ەل تاۋەلسىزدىگىمىز ءۇشىن قىزمەت ەتسەك، الدىعا قويعان ماقساتتىڭ بارىنە جەتەمىز»، دەدى ب.جاقىپ.
عيبراتتى دا تاعىلىمدى كەشكە ق ر ەڭبەك سىڭىرگەن قايراتكەرى، بەلگىلى اقىن رافاەل نيازبەك، حالىقارالىق «الاش ادەبي» سىيلىعىنىڭ لاۋرەاتى، اقىن ءادىلعازى قايىربەكوۆ، ق ر جازۋشىلار وداعىنىڭ باسقارما ءتوراعاسىنىڭ ورىنباسارى، اقىن جاناربەك ءاشىمجان قاتىسىپ، اقىننىڭ شىعارماشىلىعىنان سىر شەرتىپ، ءتول تۋىندىلارىن وقىپ بەردى.
كەش سوڭىندا پەداگوگيكا جانە پسيحولوگيا فاكۋلتەتىنىڭ دەكانى، پ.ع.د.پروفەسسور سايرا جيەنبايەۆا اقىنعا التىن ۋاقىتىن ءبولىپ، جىر الەمىمەن، سىرلى الەمىمەن بولىسۋگە كەلگەنى ءۇشىن ۇلكەن العىسىن ءبىلدىرىپ، قازاقى ءداستۇر بويىنشا بارشا قوناقتارعا سىي-سىياپات جاسادى. ءوز كەزەگىندە اقىن ءوز قولتاڭباسى قويىلعان كىتاپتارىن جاستارعا تارتۋ ەتتى.
«قىزدار ۋنيۆەرسيتەتى» مەديا ورتالىعى
