Bloomberg اگەنتتىگىنىڭ مالىمەتىنشە، جۇڭگو جەتكىزۋشىلەرى رەسەيدىڭ ۋكرايناعا قارسى قولدانىلىپ جاتقان سوققى دروندارىن قۇراستىرۋ ءۇشىن قاجەتتى بولشەكتەرمەن قامتاماسىز ەتۋدە باستى رولگە يە، دەپ حابارلايدى Dalanews.kz.
اگەنتتىك تانىسقان قۇجاتتارعا سايكەس، 2023 جىلى ۋكراينا ارنايى قىزمەتتەرى دايىنداعان ەسەپتە رەسەي دروندارىنداعى شەتەلدىك كومپونەنتتەردىڭ 92%-ى قىتايدا وندىرىلگەنى كورسەتىلگەن. بۇل – ەلەكترونيكا، كامەرالار، قوزعالتقىشتار، انتەننالار مەن ناۆيگاسيالىق مودۋلدەر سەكىلدى ماڭىزدى بولشەكتەر.
كومپونەنتتەر رەسەيگە تىكەلەي دە، سونداي-اق گونكونگ، تۇركيا جانە بىرىككەن اراب امىرلىكتەرى ارقىلى دەلدال كومپانيالار جەلىسىمەن دە جەتكىزىلەدى. قىتايلىق جەتكىزۋشىلەردىڭ قاتارىندا وزدەرىن تەك ازاماتتىق سەكتوردا جۇمىس ىستەيدى دەپ كورسەتەتىن ءىرى وندىرۋشىلەر دە بار. كەيبىرى اۋىل شارۋاشىلىعى تەحنيكاسى نەمەسە اەروفوتوتۇسىرىلىمگە ارنالعان قۇرال رەتىندە بۇركەمەلەپ، اسكەري ماقساتتاعى جابدىقتى رەسەيگە جونەلتىپ وتىرعان.
ەسەپتە درونداردى رەسەيدەگى ءوندىرىس وشاقتارى – تاتارستان مەن يجيەۆسك قالالارىنداعى كاسىپورىنداردا جيناپ جاتقانى ايتىلعان. قۇراستىرۋ جۇمىستارى يران ليسەنزياسى بويىنشا (Shahed/Geran ۇلگىلەرى) جانە جەرگىلىكتى ازىرلەمەلەر نەگىزىندە جۇزەگە اسىرىلۋدا.
قۇجاتتا اتالعان مالىمەتتەر ۇشىرىلعان جانە اتىپ تۇسىرىلگەن درونداردى تالداۋ، لوگيستيكالىق قۇجاتتار مەن قارجىلىق وپەراسيالار نەگىزىندە جينالعان. وندا ناقتى قىتايلىق كومپانيالار مەن جەتكىزۋ كولەمدەرى، بىرنەشە ميلليون دوللارلىق كەلىسىمشارتتار كورسەتىلگەن. قىتايلىق بولشەكتەردى قولدانۋ رەسەيگە درون ءوندىرىسىن جولعا قويۋعا، نىسانانى ءدال انىقتاۋدى جاقسارتۋعا جانە راديوەلەكتروندىق قارسى ءىس-قيمىل جاعدايىنا بەيىمدەلگەن قۇرىلعىلاردى جاساۋعا مۇمكىندىك بەرگەن.
اقش پەن وداقتاستارى بۇل دەرەكتەر اياسىندا ەكسپورتتىق باقىلاۋدى كۇشەيتۋدى قاراستىرۋدا، الايدا سانكسيالاردى اينالىپ ءوتۋ ءۇشىن ءۇشىنشى ەلدەر ارقىلى جۇرەتىن تەتىكتەردىڭ ءالى دە وسال تۇس بولىپ وتىرعانىن مويىندايدى. جۇڭگو اسكەري كومەك كورسەتىپ وتىرعانىن رەسمي تۇردە جوققا شىعارعانىمەن، قوس ماقساتتاعى (اسكەري جانە ازاماتتىق) تەحنولوگيالىق ونىمدەردى ەكسپورتتاۋدى بەلسەندى تۇردە جالعاستىرىپ وتىر.
7 شىلدەدە ۋكراينا قورعانىس مينيسترلىگىنە قاراستى باس بارلاۋ باسقارماسى «شاحەد» تيپىندەگى درونداردا قىتايدا جاسالعان ەلەكتروندىق كومپونەنتتەردىڭ ۇلەسى 60–65%-عا جەتكەنىن حابارلادى.
ال 7 ماۋسىمدا ۋكراينا قارۋلى كۇشتەرى اۋە كۇشتەرى باسقارماسىنىڭ وكىلى يۋريي يگنات رەسەي درون ءوندىرىسىن ايتارلىقتاي ارتتىرىپ، ءبىر تۇندە ۋكرايناعا شامامەن 500 ۇشقىشسىز ۇشۋ قۇرىلعىسىن ۇشىرىپ جاتقانىن مالىمدەگەن.
