جۇڭگو حالىق رەسپۋبليكاسىنا جۇمىس ساپارى اياسىندا باتىس قازاقستان وبلىسىنىڭ اكىمى ناريمان تورەعالييەۆ سزيانسۋ پروۆينسياسىنىڭ ءىرى وندىرىستىك جانە ساۋدا كونگلومەراتتارىنىڭ ءبىرى — Jiangsu SOHO Holding Group مەملەكەتتىك كورپوراسياسىنىڭ باسشىلىعىمەن كەزدەسۋ وتكىزدى،- دەپ حابارلايدى Dalanews.kz
ءىس-شارا مەملەكەت باسشىسى قاسىم-جومارت توقايەۆ ەرەكشە نازار اۋداراتىن قازاقستان مەن جۇڭگو اراسىنداعى ءوڭىرارالىق بايلانىستى نىعايتۋ اياسىندا ءوتتى. پرەزيدەنت ەكى ەل اراسىنداعى ستراتەگيالىق سەرىكتەستىكتى تەرەڭدەتۋدىڭ ماڭىزدى قۇرالى رەتىندە وڭىرلەردىڭ تىكەلەي ىنتىماقتاستىعىن دامىتۋ قاجەتتىگىن ۇنەمى اتاپ وتەدى.
Jiangsu SOHO Holding Group 380-نەن استام كاسىپورىندى بىرىكتىرىپ، حالىقارالىق ساۋدا، لوگيستيكا، توقىما ونەركاسىبى، «اقىلدى» ءوندىرىس جانە قارجىلاندىرۋ سالاسىندا اۋقىمدى جوبالاردى جۇزەگە اسىرادى. كومپانيانىڭ سىرتقى ەكونوميكالىق وپەراسيالارىنىڭ جىلدىق كولەمى 11 ميلليارد اقش دوللارىنان اسادى، گەوگرافياسى 160-تان استام ەلدى قامتيدى.
كەزدەسۋ بارىسىندا تاراپتار كەلەسى باعىتتار بويىنشا ىنتىماقتاستىق مۇمكىندىكتەرىن تالقىلادى:
- بقو ونىمدەرىن SOHO ساۋدا الاڭدارىنا جەتكىزۋ؛
- «جۇڭگو – ورتالىق ازيا – ەۋروپا» باعىتى بويىنشا لوگيستيكالىق توراپتاردى قازاقستاندا ورنالاستىرۋ؛
- جۇڭگو تاراپىنىڭ اۋىل شارۋاشىلىعى ونىمدەرىن قايتا وڭدەۋگە جانە ساقتاۋ، وتكىزۋ ينفراقۇرىلىمىن دامىتۋعا قاتىسۋى.
SOHO-نىڭ ازيا، ەۋروپا جانە تاياۋ شىعىس ەلدەرىندەگى كوتەرمە جانە بولشەك ساۋدا ارنالارى جەلىسى ارقىلى باتىس قازاقستان وبلىسىنىڭ ونىمدەرىنىڭ ەكسپورتىن ىلگەرىلەتۋ باستاماسى ەرەكشە قىزىعۋشىلىق تۋدىردى. كومپانيا باسشىلىعى باتىس قازاقستان وبلىسىنىڭ بيزنەس وكىلدەرىنە تەگىن كەڭسە بولمەسىن بەرۋگە دايىن ەكەنىن ءبىلدىردى.
كەلىسسوزدەر قورىتىندىسى بويىنشا ينۆەستيسيالىق ۇسىنىستاردى دايىنداۋ ءۇشىن ناقتى سالا دەڭگەيىندە قوسىمشا كونسۋلتاسيالار وتكىزۋ تۋرالى كەلىسىمگە قول جەتكىزىلدى.
وبلىس اكىمى Jiangsu SOHO Holding Group سياقتى جوعارى تەحنولوگيالىق جانە حالىقارالىق نارىققا باعىتتالعان سەرىكتەستەرمەن ىنتىماقتاستىقتى ودان ءارى تەرەڭدەتۋ قازاقستاننىڭ جۇڭگو مەن ەۋرازيا ەلدەرى اراسىنداعى سەنىمدى ەكونوميكالىق كوپىر رەتىندەگى ۇستانىمىن نىعايتۋعا سەپتىگىن تيگىزەتىنىنە سەنىم ءبىلدىردى.
بۇل كەزدەسۋ قازاقستان رەسپۋبليكاسىنىڭ جۇڭگو حالىق رەسپۋبليكاسىنداعى ەلشىلىگىنىڭ قولداۋىمەن ۇيىمداستىرىلدى.
