25 تامىزدا الماتى وبلىستىق كوشى-قون قىزمەتى قىتايدا 16 جىل قاماۋدا وتىرىپ، بيىل ءساۋىر ايىندا قازاقستانداعى وتباسىنا ورالعان راقىجان زەينوللاعا قازاقستان ازاماتى ەكەنىن راستايتىن قۇجات بەردى. ايەلى فاريدا قابىلبەك كۇيەۋى راقىجان زەينوللانىڭ باسپاسوزبەن سويلەسكىسى كەلمەيتىنىن ايتتى، دەپ حابارلايدى Dalanews.kz centralasian.org-كە سىلتەمە جاساپ.

- ول جۇڭگو تۇرمەسىندەگى ۇرەيدەن ءالى ارىلا الماي ءجۇر. قازاقستانعا كەتەردە جۇڭگو پوليسياسى "باسىنان وتكەن جايتتى جاريالاماۋ" جونىندە قۇجاتقا قول قويدىرىپ العان. سوندىقتان ەشكىمگە سۇقبات بەرگىسى كەلمەيدى. بۇگىن قازاقستان ازاماتى بولعانىن راستايتىن قۇجات العانىنا قاتتى قۋانىپ وتىر، - دەيدى راقىجان زەينوللانىڭ ايەلى.

راحىجان زەينوللا 2003 جىلى قازاقستان ازاماتتىعىنا قۇجات تاپسىرعان. قازاقستاننىڭ سول كەزدەگى پرەزيدەنتى نۇرسۇلتان نازاربايەۆتىڭ وعان ازاماتتىق بەرۋ تۋرالى جارلىعى دا شىققان. ءبىراق قازاقستان ازاماتى ەكەنىن راستايتىن كۋالىگىن الماي تۇرىپ، قىتايعا قىدىرىپ بارعان ول كەرى قايتا الماي قالعان.

بۇعان دەيىن ايەلى فاريدا قابىلبەك كۇيەۋى راقىجان زەينوللانىڭ قىتايدا "اقپارات تاسۋشى ساياسي قىلمىسكەر" دەگەن ايىپپەن 13 جىلعا جازىقسىز سوتتالعانىن ايتىپ، قىتايدىڭ الماتىداعى كونسۋلدىعى الدىندا بىرنەشە رەت نارازىلىققا شىققان.

راحىجان زەينوللا 2018 جىلى تۇرمەدەن شىعىپ، قايتا ۇستالىپ، تاعى دا ءبىر جىل ساياسي لاگەردە بولعان. ودان كەيىن تاعى دا ەكى جىلعا جۋىق ءۇيقاماقتا وتىرعان ول 2021 جىلى 9 ساۋىردە قىتايدىڭ چەندۋ قالاسىنان الماتىعا ۇشىپ كەلگەن.

58 جاستاعى راقىجان زەينوللا قىتايدىڭ بورو-تالا-مونعول اۆتونوميالىق وبلىسىنىڭ اراسان اۋدانىنا قاراستى قارابۇقا كەنتىندە تۋىپ-وسكەن. 2000 جىلى وتباسىمەن بىرگە قازاقستانعا كوشىپ، الماتى وبلىسىنا قونىستانعان. 2004 جىلى شىڭجاڭعا قىدىرىپ بارعان راقىجان زەينوللانى پوليسيا ۇستاپ، جاۋاپقا تارتقان.