وتكەن تۇندە جامبىل وبلىسىنىڭ قورداي اۋدانىندا قۇقىقتىق ءتارتىپتى بۇزۋ فاكتىلەرى تىركەلگەن جوق. جاعداي تۇراقتالدى، اۋىلدىقتاردىڭ ءومىرى قالىپتى ارناسىنا تۇسۋدە، - دەدى وقيعا ورنىندا جۇرگەن ۇكىمەتتىك كوميسسيا، دەپ حابارلايدى zakon.kz ۇكىمەتتىڭ رەسمي سايتىنا سىلتەمە جاساپ.
ۇكىمەت كوميسسياسى جۇمىسىنىڭ ەكىنشى كۇنىن اۋىلدار مەن شەكارا ماڭى وتكىزۋ پۋنكتتەرىن ارالاۋدان باستادى.
«قاراسۋ» شەكارا بەكەتىندە ادامدار جوق، ال قىرعىزستاننان كەلگەن ادامدار كەزەگى «اۋقاتتى» پۋنكتىندە پايدا بولعان. بۇلار – وسىعان دەيىن كورشىلەس رەسپۋبليكاعا كەتىپ قالىپ، ەندى ۇيلەرىنە ورالىپ جاتقان قازاقستاندىقتار. ولاردىڭ ىشىندە ايەلدەر مەن بالالار كوپ.
بەردىبەك ساپاربايەۆ وتانداستارىمىزدان سابىرلىق ساقتاپ، ارانداتۋلاردىڭ ىقپالىندا كەتپەۋدى سۇرادى.
– سىزدەردەن ارانداتۋلارعا ەرمەۋدى سۇرايمىز. بۇزىلعان بارلىق ۇيلەردى ءبىز قالپىنا كەلتىرەمىز، وتباسىلارعا كومەك كورسەتەمىز. ءبىزدىڭ ماماندار جۇمىس ىستەپ جاتىر، زالالدى باعالاۋدا. ءبىزدىڭ بارلىعىڭىزعا تاعى ايتارىمىز، كەتىپ قالعان، ءقازىر قىرعىزستاندا ءوز تۋىستارىن پانالاپ جاتقان جاقىن-جۋىقتارىڭىزعا ەلگە قايتۋ كەرەكتىگىن جەتكىزسەڭىزدەر، – دەدى ب. ساپاربايەۆ وتكىزۋ پۋنكتىندە جينالعان قاۋىمعا.
ب. ساپاربايەۆ اۋدانداعى جاعدايدىڭ تۇراقتالعانىنا سەندىردى.
– پرەزيدەنت تاپسىرماسى بويىنشا مۇندا ارنايى ۇكىمەت كوميسسياسى كەلدى، ونىڭ قۇرامىندا مەملەكەتتىك جانە قۇقىق قورعاۋ ورگاندارىنىڭ باسشىلارى بار. وتكەن تاۋلىكتە ەشقانداي وقيعا دا، قۇقىق بۇزۋشىلىق تا بولعان جوق. جاعداي تۇراقتالدى. قۇقىق قورعاۋ ورگاندارىنىڭ كۇشىنىڭ ارقاسىندا ءتارتىپ پەن قاۋىپسىزدىك ورناتىلدى. تاعى دا سىزدەردەن ارانداتۋلارعا ىلەسپەۋدى سۇرايمىز، – دەدى ب. ساپاربايەۆ.
ايتا كەتەيىك، ەلگە ورالىپ جاتقان قازاقستاندىقتار شەكارادان جەڭىلدەتىلگەن رەجيمدە وتەدى.
