قىرعىزستان پرەزيدەنتى سادىر جاپاروۆتىڭ نەمەرە قارىنداسىنىڭ كۇيەۋ جىگىتى ەسىرتكى ساۋداسىمەن اينالىستى دەگەن كۇدىكپەن قاماۋعا الىندى، دەپ حابارلايدى Dalanews.kz.
بۇل تۋرالى سادىر جاپاروۆتىڭ باسپا ءسوز حاتشىسى اسحات الاگوزوۆ ءوزىنىڭ Facebook-تەگى پاراقشاسىندا جازدى.
"پرەزيدەنت سادىر جاپاروۆتىڭ ءىنىسىنىڭ قىزىنىڭ جىگىتى قۇقىق قورعاۋ ورگاندارىنىڭ وكىلدەرىمەن ۇستالعانىن راستايمىز"، - دەدى الاگوزوۆ.
مەملەكەت باسشىسىنىڭ باسپا ءسوز حاتشىسى جاس جىگىتتىڭ بويجەتكەنگە ەرەكشە ۇسىنىس جاساۋ ارقىلى تانىلعانىن اتاپ ءوتتى.
"ءلاززات نۇرقوجويەۆانىڭ جىگىتى وعان تىكۇشاقتا ۇيلەنۋ تۋرالى ۇسىنىس بىلدىرگەن سوڭ تانىلدى. جاس جىگىتتىڭ نەگىزگى ماقساتى ءوز قىزمەتىن جاسىرۋ ءۇشىن بيلىكتەن «كرىشا» ىزدەدى دەۋگە تولىق نەگىز بار"، - دەپ قوستى ول.
ەسكە سالايىق، قىرعىزستان پرەزيدەنتى سادىر جاپاروۆتىڭ قارىنداسى ءلاززات نۇرقوجايەۆاعا سۇيىكتىسى ۇيلەنۋگە ءسوز سالۋ ءۇشىن جاستار ورۋۋ-ساي شاتقالىنا ءتجم-نىڭ تىكۇشاعىمەن ۇشىپ بارعان.
جاپاروۆ بولاشاق كۇيەۋ بالاسىنىڭ بۇل قىلىعىن قۇپتامايتىنىن ايتتى. سونداي-اق قىرعىستان پرەزيدەنتى تجم-عا جاڭادان ساتىپ الىنعان تىكۇشاقتار ءوزىنىڭ قۇنىن اقتاۋ ءۇشىن كوممەرسيالىق ماقساتتا پايدالانۋعا رۇقسات ەتىلگەنىن اتاپ ءوتتى.
"بۇرىن مەن باسقالاردى سىنايتىن ەدىم، ەندى ءوزىمنىڭ الدىمنان شىقتى. قارىنداسىم ءۇشىن حالىقتان كەشىرىم سۇرايمىن. ءالى جاس، ءبىراق قوعامنىڭ سىنىن كورىپ وتىر. بۇل وقيعادان ساباق الادى دەپ ويلايمىن"، - دەدى جاپاروۆ.
دەرەكەرگە سۇيەنسەك، كۇيەۋ جىگىت بىرنەشە كۇننەن بەرى ەسىرتكى ساۋداسىمەن اينالىسقان دەگەن كۇدىكپەن ۋاقىتشا ۇستاۋ يزولياتورىندا وتىر.
