مەملەكەت باسشىسى قاسىم-جومارت توقايەۆتىڭ جوعارى وقۋ ورىندارى وقىتۋشىلارىنىڭ جالاقىسىن ارتتىرۋ تۋرالى تاپسىرماسىنا سايكەس، ءبىلىم ورداسىنىڭ باسقارما ءتوراعاسى – رەكتور جانسەيىت تۇيمەبايەۆتىڭ شەشىمىمەن ەندىگى جەردە وقىتۋشى – 200 000 تەڭگە، اعا وقىتۋشى – 280 000 تەڭگە، دوسەنت – 330 000 تەڭگە، پروفەسسور 500 000 تەڭگە جالاقى الادى.
بۇدان بولەك، رەكتور نۇسقاۋىمەن قازۇۋ-دا ءار جارتى جىل سايىن Scopus مالىمەتتەر بازاسىنىڭ جۋرنالدارىندا ماقالا جاريالاعان اۆتورلارعا قوماقتى قارجىلاي سىياقى بەرىلەتىن بولدى. رەسپۋبليكالىق بەدەلدى عىلىمي تانىمدىق گازەت-جۋرنالداردا ماقالاسى جارىق كورگەن وقىتۋشىلارعا دا جىلىنا ەكى رەت ارنايى بونۋستار تولەنەدى.
سونداي-اق عالىم-وقىتۋشىلاردىڭ جارىق كورگەن وقۋ قۇرالدارى، مونوگرافيالارى مەن كىتاپتارى ءۇشىن دە ۋنيۆەرسيتەتتەگى ينديكاتيۆتىك جوسپار بويىنشا بالل بەرىلىپ، سىياقى تاعايىنداۋ جولدارى قاراستىرىلىپ وتىر.
ەڭبەكاقىنى ءوسىرۋ باسەكەلەستىكتى ارتتىرىپ، ۋنيۆەرسيتەتكە مىقتى مامانداردىڭ كەلۋىنە جول اشپاق. سول سەبەپتەن قازۇۋ-دا جالاقىنىڭ ارتۋىمەن قاتار، وقىتۋشى-پروفەسسورلىق قۇرامنىڭ كاسىبي بىلىكتىلىگىن كوتەرۋ، تالانتتى جاستارعا قولداۋ كورسەتۋ جۇمىستارى جۇيەلى جولعا قويىلۋدا. وقىتۋشىلىق قىزمەتكە كونكۋرستىق نەگىزدە ەڭ بىلىكتى ءارى ءبىلىمدى ماماندار ىرىكتەلىنىپ الىنادى.
بۇل شارالار ءبىلىم بەرۋ ساپاسىن ارتتىرۋعا، وقىتۋشىلاردى الەۋمەتتىك قولداۋعا جانە وقىتۋشى بەدەلىن ارتتىرۋعا باعىتتالعان. عالىم-وقىتۋشىلاردىڭ ارتىق جۇكتەمەدەن ارىلىپ، وقۋ ۇدەرىسىنە، زەرتتەۋ جۇمىستارىنا جانە ساباقتىڭ ساپاسىنا كوڭىل قويۋى ءۇشىن بارلىق جاعداي جاسالۋدا.
ايتا كەتسەك، اعىمداعى جىلدىڭ اقپان ايىندا قازۇۋ رەكتورى جانسەيىت تۇيمەبايەۆتىڭ بۇيرىعىمەن وقۋ ورداسىنداعى بارلىق قىزمەتكەرلەردىڭ جالاقىسى 20 پايىزعا وسكەن بولاتىن. كۇنى كەشە Scopus دەرەكتەر بازاسىنىڭ حالىقارالىق رەيتينگتىك باسىلىمدارىندا ماقالا جاريالاعان 234 عالىم 74،8 ملن. قارجىلاي سىياقىمەن ماراپاتتالدى.
