ءال-فارابي اتىنداعى قازۇۋ ادام قۇقىعى، ساۋاتتىلىعى، تۇراقتى دامۋ جانە قاقتىعىستاردى شەشۋ سياقتى بۇۇ–نىڭ الەم تانىعان ون قاعيداسىن قولداۋعا باعىتتالعان «اكادەميالىق ىقپال» باعدارلاماسىنا ورتالىق ازيا ۋنيۆەرسيتەتتەرى ىشىندە ءبىرىنشى بولىپ قوسىلدى. قازۇۋ-دە 2014 جىلى ناۋرىزدا بىرىككەن ۇلتتار ۇيىمىنىڭ «اكادەميالىق ىقپال» عالامدىق حاب باعدارلاماسىنىڭ اشىلۋ سالتاناتى بولدى. بۇل باعدارلاما الەم ەلدەرى اراسىنداعى يدەيالار، تاجىريبە، پىكىر الماسۋعا ارنالعان تالقىلاۋ الاڭى قىزمەتىن اتقارادى. اكادەميالىق ىقپال – زياتكەرلىك الەۋمەتتىك جاۋاپكەرشىلىكتىڭ جاڭا مادەنيەتىن ىلگەرى جىلجىتۋ ءۇشىن اقىل-ويدى عالامدىق قوزعالىسقا باعىتتاۋ. قازۇۋ بۇكىل ادامزاتقا ورتاق اسا ماڭىزدى پروبلەمالاردى شەشۋگە جاھاندىق اكادەميالىق قاۋىمداستىقتى تارتىپ، جان-جاقتى قولداۋ كورسەتەدى. ۋنيۆەرسيتەت عالىمدارى جاساعان عىلىمي زەرتتەۋلەر مەن ەكسپەريمەنتتەرىنىڭ ناتيجەلەرى تۇراقتى دامۋ يدەيالارىن ىلگەرىلەتۋگە ەداۋىر ىقپال ەتۋدە.
– ءبىزدىڭ ۋنيۆەرسيتەت بۇۇ–نىڭ ون قاعيداسىندا كورسەتىلگەن پرينسيپتەرگە باعىتتالعان «اكادەميالىق ىقپال» باعدارلاماسى بويىنشا جۇمىس ىستەپ جاتىر، ءارى قاراي جالعاستىرا بەرۋگە دايىن. مۇمكىندىكتەرىمىز دە بار. وسىنداي بەيرەسمي جاعدايدا كەزدەسىپ، بۇرىن كەلىسىلگەن، قول قويىلعان بارلىق باعىتتاردى دامىتۋىمىزعا بولادى. اكادەميالىق ىقپال ماسەلەسى بويىنشا ءسىزدىڭ تاجىريبەڭىز مول، ءبىز سونى قولداپ ءارى قاراي دامىتۋعا ءتيىسپىز. بۇل باعىتتا بارلىق ماسەلەلەر بويىنشا اقىلداسىپ، الداعى ۋاقىتقا ءوزىمىزدىڭ ناقتى جوسپارلار مەن ءىس-شارالاردىڭ جوبالارىن جاساۋ ءۇشىن ءجيى كەزدەسىپ تۇرۋ كەرەك سياقتى. حالىقارالىق ىنتىماقتاستىقتىڭ شەتەلدىك تاجىريبەسى ءبىز ءۇشىن وتە ماڭىزدى. قازۇۋ بۇۇ-نىڭ حابى بولۋىنىڭ ءوزى ۇلكەن بەدەل، بىزگە دەگەن بۇۇ-نىڭ سەنىم ارتۋى دەپ تۇسىنەمىز، – دەدى ءوز سوزىندە رەكتور جانسەيت تۇيمەبايەۆ.
بۇۇ وكىلى ۆلاستەميل سامەك ۋنيۆەرسيتەتپەن ۇزاق جىلدىق ىنتىماقتاستىق ءۇشىن رەكتورعا ريزاشىلىعىن ءبىلدىردى. ول 2006 جىلدان بەرى قازۇۋ-مەن جاقىندىعىن جانە ۋنيۆەرسيتەت پەن بۇۇ-نىڭ بەلسەندى، تىعىز قارىم-قاتىناستا جۇمىس ىستەپ كەلە جاتقانىن ايتتى.
– قازۇۋ-دىڭ تۇراقتى دامۋ سالاسىنداعى كوپجىلدىق جوسپارلى جۇمىسى، ءعىلىمي-بىلىم بەرۋ الەۋەتى مەن جوو-نىڭ جەتىستىكتەرى بۇۇ تاڭداۋىنا قاتتى ىقپال ەتتى. UNAI حابىنىڭ قازۇۋ-دا اشىلۋى ‒ بۇل بەدەلدى حالىقارالىق ۇيىمنىڭ جوعارى دارەجەدەگى سەنىمىنىڭ، بۇكىل ادامزات وركەنيەتىنىڭ جاھاندىق دامۋ ترەندى بولىپ تابىلاتىن ۋنيۆەرسيتەتتىڭ تۇراقتى دامۋ سالاسىنداعى جەتەكشى ءرولىنىڭ دالەلى. قازۇۋ جاھاندىق حاب رەتىندە ءتورتىنشى مەرزىمگە قالدىرىلدى. ارينە، لايىقتى بولعان سوڭ، بۇل ءاربىر جوو قولىنان كەلمەيدى، ‒ دەپ اتاپ ءوتتى ۆلاستەميل سامەك. – جاقىندا، 2 ناۋرىز كۇنى قازاقستان تاۋەلسىز مەملەكەت رەتىندە بۇۇ-عا كىرگەنىنە 29 جىل تولۋىن اتاپ ءوتتى. مەنىڭ قۇتتىقتاۋىمدى قابىل الىڭىزدار. بۇۇ باسشىلىعى ۇنەمى الدىڭعى قاتاردان تابىلاتىن سىزدەردىڭ ۋنيۆەرسيتەتىڭىزگە ريزا. ەلباسى نۇرسۇلتان نازاربايەۆ تا، قازاقستان پرەزيدەنتى قاسىم-جومارت توقايەۆ تا بۇۇ-نىڭ ۇلكەن مىنبەرىنەن الماتىنى بۇۇ-نىڭ كوپجاقتى ديپلوماتيانىڭ وڭىرلىك حابىنا اينالدىرۋ نيەتىن بىلدىرگەنىن بىلەسىزدەر. ۋنيۆەرسيتەتتىڭ شاڭىراعى استىندا كوپتەگەن پايدالى، يگى ىستەر جۇزەگە اسىرىلۋدا. تاعى ءبىر ماڭىزدى جۇمىس – جاستارعا باعىتتالعان بۇۇ 2030 ستراتەگياسىنا دايىندىق. ايتا كەتەيىن، سىزدەردىڭ ۋنيۆەرسيتەتتەرىڭىز حالىقارالىق شارالارعا ماماندانعان. قازاقستانداعى بۇۇ وكىلدىگىنىڭ جانە الماتىداعى اقش باس كونسۋلدىعىنىڭ قولداۋىمەن قازۇۋ «بۇۇ مودەلى ‒ جاڭا جىبەك جولى» الەمدىك ستۋدەنتتىك باعدارلاما-ويىندارىنىڭ ءبىر بولىگى بولدى. وسى باعىتقا كوپ كوڭىل ءبولىپ، بىزگە قولداۋ كورسەتىپ بىرگە جۇمىس ىستەپ جاتقاندارىڭىز ءۇشىن سىزدەرگە تاعى دا العىس ايتامىن. بىزدە ءارتۇرلى ءىس-شارالار وتكىزىلىپ تۇرادى، سىزدەردى قوناق رەتىندە سولاردا كورگىم كەلەدى.
كەزدەسۋدى قورىتىندىلاي وتىرىپ قازۇۋ رەكتورى جوعارى مارتەبەلى قوناققا ءوز العىسىن ءبىلدىردى جانە ستۋدەنتتەرمەن ونلاين-كەزدەسۋ ۇيىمداستىرىپ بۇۇ-ڭ جاھاندىق ماسەلەلەرى مەن جوبالارى تۋرالى اڭگىمەلەپ بەرۋگە شاقىردى. جانسەيىت قانسەيىت ۇلى قازۇۋ-دا ۋنيۆەرسيتەت ستۋدەنتتەرى ءۇشىن تانىمال شەتەلدىك عالىمدار مەن كورنەكتى قايراتكەرلەردىڭ دارىستەر لەگى باستالعالى وتىرعاندىعى تۋرالى حابارلادى.
