جيىندا جازۋشىنىڭ ءومىرى مەن شىعارماشىلىعىنا ارنالعان «عيبراتتى عۇمىر» اتتى سەريالىق كىتابىنىڭ جانە بالالارعا ارنالعان «سۇر كوبەلەك» كىتابىنىڭ سالتاناتتى تۇساۋكەسەر ءراسىمى ءوتتى.
ءىس-شاراعا ق ر پرەزيدەنتىنىڭ كەڭەسشىسى مالىك وتاربايەۆ، قازۇۋ-دىڭ باسقارما ءتوراعاسى – رەكتورى جانسەيىت تۇيمەبايەۆ، قالامگەرلەر – دۋلات يسابەكوۆ، نۇرلان ورازالين، سماعۇل ەلۋباي، ساۋىتبەك ءابدىراحمانوۆ، مەملەكەت جانە قوعام قايرتكەرلەرى، راحمەتوللا رايىمقۇلوۆتىڭ قىزى، ر.باعلانوۆا اتىنداعى «قازاقكونسەرت» مەملەكەتتىك كونسەرتتىك ۇيىمىنىڭ باسشىسى اقتوتى رايىمقۇلوۆا، وقۋ ورداسىنىڭ وقىتۋشى-پروفەسسورلار قۇرامى مەن ءبىلىم الۋشى جاستار قاتىستى.
كونفەرەنسيا بارىسىندا مەملەكەت باسشىسى قاسىم-جومارت توقايەۆتىڭ قۇتتىقتاۋ حاتىن ق ر پرەزيدەنتىنىڭ كەڭەسشىسى مالىك وتاربايەۆ وقىپ بەردى. حاتتا: «راحمەتوللا رايىمقۇلوۆ – رۋحانياتىمىزدىڭ وركەندەۋىنە زور ۇلەس قوسقان قالامگەر. جازۋشىنىڭ شوقتىعى بيىك شىعارمالارى وقىرمان قاۋىمنىڭ جۇرەگىنە جول تاۋىپ، لايىقتى باعاسىن الدى. سونداي-اق ول شەتەلدىڭ كلاسسيكالىق تۋىندىلارىن قازاق تىلىنە اۋدارىپ، رۋحاني مول مۇرا قالدىردى. قالامگەردىڭ ەڭبەك جولى وسكەلەڭ ۇرپاققا ۇلگى بولارى ءسوزسىز»، – دەلىنگەن.
سونىمەن قاتار جيىندا ق ر اقپارات جانە قوعامدىق دامۋ ءمينيسترى دارحان ءقىدىرالىنىڭ، ق ر مادەنيەت جانە سپورت ءمينيسترى اسحات ورالوۆتىڭ قۇتتىقتاۋ حاتى وقىلدى.
ءوز كەزەگىندە ءال-فارابي اتىنداعى قازۇۋ رەكتورى جانسەيىت تۇيمەبايەۆ ءسوز سويلەپ، راحمەتوللا رايىمقۇلوۆتىڭ ەڭبەك جولىنا توقتالدى.
«راحمەتوللا رايىمقۇلوۆتىڭ ىزدەنىس جولى 1935 جىلى تاشكەنت پەدينستيتۋتىنان باستالعان. كوپتەگەن جاس قالامگەرگە كەڭەسىن ايتىپ، جول نۇسقاپ وتىردى. باسشىلىق قىزمەتتە ءجۇرىپ، ادەبي شىعارماشىلىقپەن اينالىستى. قالامگەردىڭ ەسىمى ادەبي ورتادا، وقىرمان اراسىندا كەڭىنەن تانىلدى»، – دەدى جانسەيىت تۇيمەبايەۆ.
كونفەرەنسيا بارىسىندا فيلولوگيا عىلىمىنىڭ دوكتورى، پروفەسسور قانسەيىت ابدەز ۇلى بايانداما جاساپ، قالامگەرلەر قاۋىمى ەستەلىكتەرىمەن ءبولىستى.
«راحمەتوللا رايىمقۇلوۆ – قازاق ادەبيەتىنە جاڭاشا سەرپىن الىپ كەلگەن تۇلعا. ونىڭ كەز كەلگەن تۋىندىسى وقىرمان جۇرەگىنەن ورىن الا ءبىلدى. ۇرپاققا قالدىرعان مۇراسى ۇشان-تەڭىز. وسىنداي ادەبيەت الەمىندە وزىندىك قولتاڭباسىن قالدىرعان جازۋشىلارىمىزدى ەشقاشان ۇمىتپاۋىمىز قاجەت. بۇگىنگى يگى شارانىڭ ماڭىزدىلىعى جوعارى»، – دەدى دۋلات يسابەكوۆ.
كەزدەسۋ سوڭىندا جازۋشىنىڭ قىزى اقتوتى رايىمقۇلوۆا كەشتى ۇيىمداستىرعانى ءۇشىن قازۇۋ باسشىلىعىنا ريزاشىلىعىن ءبىلدىردى. ءوز سوزىندە ول بۇگىنگى «عيبراتتى عۇمىر» سەرياسى ارقىلى باسىلىپ شىققان كىتاپتىڭ ورنى بولەك ەكەنىن جەتكىزدى.
سونداي-اق كونفەرەنسيادا راحمەتوللا رايىمقۇلوۆقا ارنالعان رەسپۋبليكالىق شىعارماشىلىق بايقاۋدىڭ جەڭىمپازدارى انىقتالىپ، ارنايى سىيلىقتارمەن ماراپاتتالدى.
شارا اياسىندا جازۋشىنىڭ ءومىرى مەن شىعارماشىلىعىنا ارنالعان فوتو جانە كىتاپ كورمەسى ۇيىمداستىرىلدى.
ءال-فارابي اتىنداعى قازۇۋ-دىڭ باسپا ءسوز قىزمەتى
