ءىس-شارا بارىسىندا بولات سارسەنبايەۆ ورتالىقتىڭ جەتەكشى الەمدىك جانە وتاندىق ءبىلىم بەرۋ مەكەمەلەرىمەن، عىلىمي-زەرتتەۋ ينستيتۋتتارىمەن جانە ساراپشىلارمەن ىنتىماقتاستىعىنىڭ ماڭىزدىلىعىن اتاپ ءوتىپ، اباي اتىنداعى قازاق ۇلتتىق پەداگوگيكالىق ۋنيۆەرسيتەتى – ۇلتتىق عىلىم مەن مادەنيەتتىڭ ءىرى ورتالىقتارىنىڭ ءبىرى، ول جوعارى كاسىبي پەداگوگتاردى عانا ەمەس، سونىمەن قاتار ءار ءتۇرلى عىلىمي باعىتتاعى جاس عالىمداردى دايىنداۋمەن اينالىساتىنىن باسا ايتتى.
اتاپ ايتقاندا، بولات سارسەنبايەۆ دارحان ءبىلالوۆتى قازۇپۋ رەكتورى قىزمەتىنە كىرىسۋىمەن قۇتتىقتاپ، وعان ن.نازاربايەۆ ورتالىعىنىڭ قازاقستان تاۋەلسىزدىگىنىڭ 30 جىلدىعىنا ورايلاستىرىلعان شارالار كەشەنىن جۇزەگە اسىرۋى، 2021 جىلعى سەز حاتشىلىعىنىڭ ءحىح وتىرىسى مەن 2022 جىلعى الەمدىك جانە ءداستۇرلى دىندەر ليدەرلەرىنىڭ VII سەزىنە دايىندىق جوسپارلارى تۋرالى حاباردار ەتتى.
ءوز كەزەگىندە «اباي اتىنداعى قازۇپۋ» كەاق باسقارما ءتوراعاسى – رەكتور دارحان ءبىلالوۆ ءوزارا قىزىعۋشىلىق تۋدىراتىن سالالارداعى بىرلەسكەن ءىس-شارالار مەن جوبالاردى جۇزەگە اسىرۋعا، كونفەسسياارالىق جانە وركەنيەتارالىق ديالوگتى دامىتۋعا جان-جاقتى قولداۋ كورسەتۋگە دايىن ەكەندىگىن ءبىلدىردى.
كەزدەسۋگە ۋنيۆەرسيتەت رەكتورىنىڭ كەڭەسشىسى جاناتبەك ىشپەكبايەۆ جانە الەۋمەتتىك دامۋ جونىندەگى پرورەكتور شىڭعىس نۇرلانوۆ قاتىسىپ، جاستاردىڭ ءدىني ساۋاتتىلىعىن ارتتىرۋ جانە ولاردى دەسترۋكتيۆتى ءدىني اعىمداردىڭ ىقپالىنان قورعاۋ ماقساتىندا ۋنيۆەرسيتەتتە اتقارىلىپ جاتقان جۇمىستار تۋرالى ايتىپ ءوتتى.
كەزدەسۋ بارىسىندا كونفەسسياارالىق كەلىسىمدى ورناتۋدا ءتيىمدى شەشىمدەر تابۋعا باعىتتالعان قازاقستان رەسپۋبليكاسىنىڭ تۇڭعىش پرەزيدەنتى - ەلباسى ن.نازاربايەۆتىڭ حالىقارالىق باستامالارىن ىلگەرىلەتۋدەگى ن.نازاربايەۆ ورتالىعىنىڭ نەگىزگى ماقساتتارى مەن مىندەتتەرىنە ەرەكشە نازار اۋدارىلدى.
الداعى ۋاقىتتا ورتالىق پەن ۋنيۆەرسيتەت كونفەسسياارالىق جانە ەتنوسارالىق كەلىسىمنىڭ بىرەگەي قازاقستاندىق ۇلگىسىن حالىقارالىق دەڭگەيدە ىلگەرىلەتۋ بويىنشا حالىقارالىق كونفەرەنسيالار، تاقىرىپتىق كورمەلەر ۇيىمداستىرۋدى سىندى ورتاق جوبالاردى جۇزەگە اسىرۋدا ىنتىماقتاسۋعا نيەتتى. سونىمەن قاتارا، تاراپتار ورتالىق بازاسىندا ۋنيۆەرسيتەتتىڭ ستۋدەنتتەرى مەن ماگيسترانتتارى ءۇشىن كاسىبي تاجىريبە مەن تاعىلىمدامانى ۇيىمداستىرىپ، اكادەميالىق ىنتىماقتاستىقتى دامىتۋ باعىتىندا ناتيجەلى جۇمىستاردى جۇرگىزەتىن بولادى.
