«قازپوشتا» اكسيونەرلىك قوعامى اتاقتى قازاق عالىمدارى، قوعام جانە مەملەكەت قايراتكەرلەرى – ءاليحان بوكەيحانوۆ، ىبىراي التىنسارين، قايىم مۇحامەدحانوۆتارعا ارنالعان «ەستەلىك جانە مەرەيتويلىق كۇندەر» سەريالى پوشتالىق ماركالارىن اينالىمعا ەنگىزدى.

اتالمىش پوشتالىق ماركالاردىڭ ءبىر سەرياسى «ءاليحان بوكەيحانوۆتىڭ تۋعانىنا 150 جىل» دەپ اتالادى. وندا «الاش» ۇلتتىق-دەموكراتيالىق پارتياسىنىڭ ۇيىمداستىرۋشىسى جانە كوشباسشىسى، تۇڭعىش قازاق ۇلتتىق الاشوردا ۇكىمەتىنىڭ باسشىسى، عالىم، پۋبليسيست ءاليحان بوكەيحانوۆ بەينەلەنگەن. ماركانىڭ نومينالى – 5 تەڭگە. تارالىمى – 2 500 000 دانا.

كەلەسى سەريانىڭ تاقىرىبى – «ىبىراي ءالتىنساريننىڭ تۋعانىنا 175 جىل». وندا قازاقتىڭ كورنەكتى اعارتۋشىسى، جاڭاشىل پەداگوگ، ەتنوگراف، اۋىز ادەبيەتىن جيناقتاۋشى، اقىن، پروزاشى، اۋدارماشى ىبىراي ءالتىنساريننىڭ سۋرەتى بار.

ال ماركالاردىڭ ءۇشىنشى سەرياسى – «قايىم مۇحامەدحانوۆتىڭ تۋعانىنا 100 جىل». وندا قازاقستان رەسپۋبليكاسى مەملەكەتتىك سىيلىعىنىڭ لاۋرەاتى، عالىم، اقىن، جازۋشى، دراماتۋرگ، اۋدارماشى، ابايتانۋ مەن شاكارىمتانۋدىڭ عىلىمي نەگىزىن قالاۋشى، قوعام قايراتكەرى  قايىم مۇحامەدحانوۆ بەينەلەنگەن.

ءار پوشتالىق ماركانىڭ تارالىمى – 2 500 000 دانا. ولار قازاقستان رەسپۋبليكاسىنىڭ ۇلتتىق بانكى بانكنوتتىق فابريكاسىندا باسىپ شىعارىلعان.

بوتاگوز مارات قىزى

 

دەرەككوزى: "استانا اقشامى" گازەتى