«Qazposhtanyń» mereitoilyq markalary
Atalmysh poshtalyq markalardyń bir seriiasy «Álihan Bókeihanovtyń týǵanyna 150 jyl» dep atalady. Onda «Alash» ulttyq-demokratiialyq partiiasynyń uiymdastyrýshysy jáne kóshbasshysy, tuńǵysh qazaq ulttyq Alashorda úkimetiniń basshysy, ǵalym, pýblitsist Álihan Bókeihanov beinelengen. Markanyń nominaly – 5 teńge. Taralymy – 2 500 000 dana.
Kelesi seriianyń taqyryby – «Ybyrai Altynsarinniń týǵanyna 175 jyl». Onda qazaqtyń kórnekti aǵartýshysy, jańashyl pedagog, etnograf, aýyz ádebietin jinaqtaýshy, aqyn, prozashy, aýdarmashy Ybyrai Altynsarinniń sýreti bar.
Al markalardyń úshinshi seriiasy – «Qaiym Muhamedhanovtyń týǵanyna 100 jyl». Onda Qazaqstan Respýblikasy memlekettik syilyǵynyń laýreaty, ǵalym, aqyn, jazýshy, dramatýrg, aýdarmashy, abaitaný men shákárimtanýdyń ǵylymi negizin qalaýshy, qoǵam qairatkeri Qaiym Muhamedhanov beinelengen.
Ár poshtalyq markanyń taralymy – 2 500 000 dana. Olar Qazaqstan Respýblikasynyń Ulttyq Banki Banknottyq fabrikasynda basyp shyǵarylǵan.
Botagóz MARATQYZY
Derekkózi: "Astana aqshamy" gazeti
