ماڭعىستاۋ وبلىسىنىڭ پروكۋراتۋراسى ۋاكىلەتتى ورگاندارمەن بىرلەسىپ مۇناي-گاز سالاسىنىڭ جەكەلەگەن كاسىپورىندارىنىڭ قىزمەتىندە تەكسەرۋ جۇرگىزىپ جاتىر. تەكسەرىس بارىسىندا بىرنەشە لاۋازىمدى تۇلعا ۇستالدى، - دەپ حابارلايدى Dalanews.kz. 

«ويل ترانسپورت كورپورەيشن» ج ش س لاۋازىمدى تۇلعالارى بيۋدجەت قاراجاتى ەسەبىنەن 700 ملن تەڭگەدەن استام سوماعا مەردىگەر كومپانيانىڭ شىعىستارىن نەگىزسىز وتەگەنى انىقتالدى. بۇدان باسقا، مەردىگەرلەرگە ناقتى كورسەتىلمەگەن كولىك قىزمەتتەرى ءۇشىن 2،2 ملرد تەڭگە اۋدارىلعان. اتالعان بۇزۋشىلىقتار بويىنشا 10 شىلدەدە قىلمىستىق كودەكستىڭ 189-بابىنىڭ 4-بولىگى  بويىنشا (اسا ءىرى مولشەردە جىمقىرۋ) سوتقا دەيىنگى تەرگەۋ باستالدى.

سونداي-اق، 22 شىلدەدە «قازمۇنايگاز «ۇك» اق ەنشىلەس ۇيىمىنىڭ 11 ملن تەڭگەسىن جىمقىرۋ فاكتىسى بويىنشا سوتقا دەيىنگى تەرگەپ-تەكسەرۋ باستالدى.

23 شىلدەدە «ويل ترانسپورت كورپورەيشن» ءجشس-نىڭ بۇرىنعى باسشىسى «ت» ۇستالدى.

قاراجاتتى جىمقىرۋ فاكتىسىمەن قك-نىڭ 189-بابىمەن بۇرىن باستالعان سوتقا دەيىنگى تەرگەپ-تەكسەرۋلەر بويىنشا «ويل ترانسپورت كورپورەيشن» ءجشس-نىڭ وندىرىستىك-تەحنيكالىق ءبولىمىنىڭ باستىعى، مەردىگەرلىك ۇيىمداردىڭ 2 وكىلى ۇستالدى.

پروكۋرورلىق تەكسەرۋ باستالعاننان بەرى بارلىعى 19 سوتقا دەيىنگى تەرگەۋ باستالدى، ولار ماڭعىستاۋ وبلىسىنىڭ ەكونوميكالىق تەرگەۋ دەپارتامەنتىنىڭ وندىرىسىندە.

بيۋدجەت قاراجاتىن جىمقىرۋ جانە تالان-تاراجعا سالۋ فاكتىلەرى بويىنشا ولاردى تەرگەۋ شەڭبەرىندە 8 ادام، ونىڭ ىشىندە «قازمۇنايگاز «ۇك» اق ەنشىلەس كومپانيالارىنىڭ 4 باسشى لاۋازىمىنداعى تۇلعالار ۇستالدى.

تەرگەۋ مۇددەسى ءۇشىن باسقا مالىمەتتەر جاريا ەتىلمەيدى.