قازىعۇرت اۋدانى جىڭىشكە اۋىل وكرۋگىندەگى «نۇر-ايدار» شارۋا قوجالىعى 3 جىلدان بەرى تاڭقۋراي ءوسىرىپ كەلەدى. العاشىندا ءۇي ىرگەلىك 7 سوتتىق جەرگە تاڭقۋراي ەگىپ داعدىلانعان ەركىن شەرالييەۆ بۇگىندە ناعىز بىلگىر مامانعا اينالعان. ءقازىر ول 3 گەكتار جەردى 49 جىلعا جالعا الىپ، كۇنىنە 200 كەلى تاڭقۋراي جيناۋدا.
«تاڭقۋرايدىڭ كەلىسىن 700 تەڭگەدەن ساتىپ جاتىرمىز. بۇل جەمىس داقىلىڭ ءار ءتۇبى 2-3 كەلىدەن ءونىم بەرەدى. ال ماۋسىمىندا 1 گەكتاردان 12 تونناعا دەيىن جەمىس جيناۋعا بولادى. جيىن –تەرىم جۇمىستارىنا 20-عا جۋىق اۋىل تۇرعىندارى تارتىلىپ، ءار قايسىسىنا كۇنىنە ءبىر كەلى تەرسە 150 تەڭگەدەن اقى تولەپ جاتىرمىز. جۇمىسشىلاردىڭ تاماعى تەگىن. مۇنداعى جۇمىسشىلار كۇنىنە ورتا ەسەپپەن 2000-3000 تەڭگەنىڭ كولەمىندە اقشا تابادى»،- دەيدى قوجالىق ءتوراعاسى ەركىن شەرالييەۆ.
نەگىزىنەن تاڭقۋراي بۇتالى كوپجىلدىق وسىمدىك سانالادى. جابايى تۇردە ازعانا بولسا دا كولەڭكەلى جەردە جاقسى وسەدى. وسىنى ەسكەرگەن قوجالىق اۋىل ىرگەسىندەگى قىراتتى اۋماقتا ارنايى تاڭداپتى. قوجالىق الداعى ۋاقىتتا جەمىس كولەمىن 1،5 گەكتارعا ۇلعايتامىن دەپ وتىر. شارۋانىڭ جۇمىس جوسپارىنا رازى بولعان وبلىس اكىمى اۋدان باسشىلىعىنا قازىعۇرت اۋدانىنداعى تاۋلى اۋىل وكرۋكتەرىندە تاڭقۋراي پلانتاسيالارىن ۇلعايتۋدى تاپسىردى.
«ءبىز وسىنداي ىسكەر ءارى باعبان ازاماتتارىمىزدى قولداۋىمىز قاجەت. «نۇر-ايدار» شارۋا قوجالىعىنىڭ تاجىريبەسىن پايدالانىپ، اۋداندا تاڭقۋراي ءوسىرۋ ءىسىن جانداندىرۋ قاجەت. ءتىپتى وسى قوجالىق وزگە شارۋالاردىڭ باسىن قوسىپ، كووپەراتيۆ قۇرۋىنا كومەكتەسۋىمىز كەرەك»،- دەدى جانسەيىت قانسەيىت ۇلى.
مۇنان سوڭ وبلىس اكىمى س. راقىموۆ اۋىل وكرۋگىندەگى «قازىعۇرت» ساۋىقتىرۋ ورتالىعى مەن بالالار لاگەرىنىڭ جۇمىسىمەن تانىستى. «نۇرلان» شارۋا قوجالىعىنىڭ يەلىگىنە قارايتىن دەمالىس ايماعى 2011-2013 جىلدارى بوي كوتەرگەن. جالپى الاڭى 2 گەكتار جەردە 44 ورىندىق 11 كوتەدج، 2 قاباتتى دەمالىس ۇيلەرى، سپورت الاڭى، اسحانا، باسسەينى بار. جالپى دەمالىس ايماعىنا 300 ملن تەڭگە ينۆەستيسيا سالىنعان. دەمالىس ايماعىندا بۇدان بولەك، اتپەن سەرۋەندەۋ جانە بيە ۇستالىپ، ساۋمال ورتالىعى جۇمىس ىستەيدى.
