ءماجىلىس دەپۋتاتى نۇرتاي سابيليانوۆ اۆتوموبيل جولدارىنىڭ جاعدايىنا جاۋاپتى ۇيىمداردىڭ قىزمەتىن سىنعا الدى، دەپ حابارلايدى Dalanews.kz.
دەپۋتاتتىڭ ايتۋىنشا، مەملەكەتتىڭ تولىق ۇلەسىنە تيەسىلى “قازاۆتوجول” ۇلتتىق كومپانياسى بىردەن ەكى مىندەتتى قاتار اتقارادى. بۇل – جولداردى سالۋ جانە ولاردىڭ ساپاسىن باقىلاۋ.
"ولار وزدەرى جول سالىپ، ءوز جۇمىسىن وزدەرى قاداعالايدى. مۇنداي جۇيە مەملەكەتتىك مىندەتتەردى ورىنداۋ كەزىندە ءتيىمسىز"، – دەدى سابيليانوۆ.
سونىمەن قاتار دەپۋتات جول اكتيۆتەرى ساپاسىنىڭ ۇلتتىق ورتالىعىنا قاتىستى دا ماسەلەلەردى اتاپ ءوتتى.
"ورتالىق جوبالارعا ساراپتاما جاسايدى، قۇرىلىسقا ۇسىنىستار بەرەدى جانە مەردىگەر ۇيىمداردىڭ كەمشىلىكتەرىن انىقتايدى. مۇنداي فۋنكسيالاردى ءبىر مەكەمەنىڭ اتقارۋى دۇرىس ەمەس"، - دەپ قوستى ول.
سابيليانوۆ جەرگىلىكتى تەحنيكالىق قاداعالاۋ قىزمەتتەرىنىڭ جۇمىسى دا تالاپقا ساي ەمەس ەكەنىن جەتكىزدى.
"بۇل قىزمەتتەردىڭ جۇمىسى كوبىنە فورمالدى تۇردە ورىندالادى، ال جولداردىڭ ساپاسى ۇلكەن سىنعا ۇشىراپ وتىر"، – دەپ تۇيىندەدى ول.
