اقيىق اقىندى مەرەيتوي يەسىن مەملەكەت باسشىسى قاسىم-جومارت توقايەۆ قۇتتىقتاۋ حاتىن جولدادى. سونىمەن بىرگە، الماتى وبلىسى اكىمىنىڭ ورىنباسارى رۋستام ءالي اقىننىڭ ۇيىنە بارىپ، وعان وبلىس اكىمى اماندىق باتالوۆتىڭ مەرەيلى جاسقا تولۋىمەن ارنايى قۇتتىقتاۋىن جانە وبلىستىق ءماسليحاتتىڭ 2020 جىلدىڭ 21 قاراشاسىنداعى №62-331 شەشىمىمەن بەرىلگەن «الماتى وبلىسىنىڭ قۇرمەتتى ازاماتى» اتاعىن تاپسىردى.
اقىننىڭ ۇزىناعاش اۋىلى، كەنەن ازىربايەۆ كوشەسىندەگى شاڭىراعىنا، سونداي-اق، وبلىستىق ارداگەرلەر كەڭەسىنىڭ ءتوراعاسى ەرمەك كەلەمسەيىت، الماتى قالاسى اكىمىنىڭ ورىنباسارى ەرجان باباقۇماروۆ كەلىپ، مەملەكەت باسشىسى قاسىم-جومارت توقايەۆتىڭ قۇتتىقتاۋىن تاپسىردى.
قازاقستان رەسپۋبليكاسىنىڭ پرەزيدەنتى قاسىم-جومارت توقايەۆتىڭ ايتىسكەر اقىن، قازاقستاننىڭ ەڭبەك سىڭىرگەن ونەر قايراتكەرىن ارنايى قۇتتىقتاۋىندا بىلاي دەلىنگەن:
«قۇرمەتتى نادەجدا اندرەيەۆنا! ءسىزدى مارتەبەلى مەرەيتويىڭىزبەن قۇتتىقتايمىن! حالقىمىز ءوزىڭىزدى ايتىس ونەرىن دامىتۋعا مول ۇلەس قوسىپ كەلە جاتقان ايتۋلى اقىن، ۇزاق جىلدار بويى ءبىلىم بەرۋ سالاسىندا قاجىرلى قىزمەت اتقارعان ۇلاعاتتى ۇستاز رەتىندە جاقسى بىلەدى جانە قۇرمەتتەيدى. ەلدىڭ بىرلىگى مەن ىنتىماعىن ساقتاۋ، دوستىق پەن سىيلاستىق جاعدايىندا باقىتتى ءومىر ءسۇرۋ، سول ارقىلى وركەنيەتتى مەملەكەت قالىپتاستىرۋ باعىتىندا جالىندى جىرلارىڭىزبەن جەتكىزگەن تىلەكتەرىڭىز قازاقستاننىڭ ءاربىر ازاماتىنىڭ جۇرەك تورىنەن ورىن الادى دەپ ەسەپتەيمىن. ونەگەلى ءومىر جولىڭىزدا ۇرپاق تاربيەسىنە ۇلكەن ءمان بەرىپ كەلەسىز. ەل جاستارىنىڭ بويىنا ادامي اسىل قاسيەتتەر مەن وتانسۇيگىشتىك رۋحىن ءسىڭىرۋ تۋرالى ىزگى باستامالارىڭىز ءاردايىم قولداۋ تابا بەرسىن. سىزگە زور دەنساۋلىق، شىعارماشىلىق تابىس جانە وتباسىڭىزعا اماندىق پەن قۇت-بەرەكە تىلەيمىن».
وبلىس باسشىسىنىڭ قۇتتىقتاۋىندا: «جاس شاعىڭىزدا سىر وڭىرىنەن باستالعان ىزدەنىس جولى تۋعان ولكەڭىز جەتىسۋ جەرىندە ودان ءارى تولىسىپ، ءسىزدى ءومىردىڭ دە، ونەردىڭ دە ۇلكەن باسپالداقتارىنا باستادى. تۇتاس ءومىرىڭىز قازاق ونەرىمەن بىتە قايناستى. جاستايىڭىزدان ويى ۇشقىر، جۇرەگى جالىن، ءسوز قۇدىرەتىن ءوز قۇدىرەتىم دەپ بىلەتىن ەرەك قاسيەتىڭىزبەن دارالاندىڭىز. ايتىستىڭ حاس دۇلدۇلدەرى ءسۇيىنباي، جامبىل، ۇمبەتالى بابالاردىڭ سالعان سارا جولىن جالعاپ، ءسوز ونەرىنىڭ تۋىن كوتەردىڭىز. جۋرناليستيكا، مادەنيەت سالالارىندا اتقارعان ەڭبەگىڭىز ءبىر توبە. ەلجاندى پەيىلىڭىز، دارحان نيەتىڭىز، تۋعان ەلدىڭ ءتىلى مەن داستۇرىنە دەگەن قۇرمەتىڭىز ءسىزدى قازاق ءۇشىن تىلەگى ءبىر، جۇرەگى ءبىر اسىل ادامعا، اياۋلى كەلىنگە، ابزال اناعا، ارداقتى اقىنعا اينالدىردى. وزىڭىزدەي اقىلى كەنەن، پاراساتى تەرەڭ اڭىز ادامنىڭ بۇگىندە ارامىزدا جۇرگەنى، جەتىسۋ ولكەسىنىڭ ازاماتى بولعانى – ءبىز ءۇشىن زور مارتەبە. ءسىزدىڭ ماعىنالى دا بايسالدى ءومىر تاجىريبەڭىز – كەيىنگى بۋىن وكىلدەرىنە، تاۋەلسىز ەلىمىزدىڭ جاستارىنا ونەگە بولارلىق تاعىلىمدى جول. ۇلاعاتتى ۇرپاقتارىڭىزبەن مىڭ جاساڭىز. سىزگە زور دەنساۋلىق، شىعارماشىلىق تابىس، وتباسىڭىزعا قۇت-بەرەكە تىلەيمىن! تويىڭىز تويعا ۇلاسسىن!» - دەلىنگەن.
اقىن، سونداي-اق، مادەنيەت جانە سپورت ءمينيسترى اقتوتى رايىمقۇلوۆادان، «قازاقستاندىق سالالىق مادەنيەت، سپورت، تۋريزم جانە اقپارات قىزمەتكەرلەرىنىڭ كاسىپتىك وداعى» قوعامدىق بىرلەستىگىنەن، وبلىستىق مادەنيەت، ارحيۆتەر جانە قۇجاتتاما باسقارماسىنان دا العىس حاتتار الدى. اقىنىن اۋدان اكىمى باعدات الييەۆ جامبىلدىقتار اتىنان قۇتتىقتاپ، سىي-سياپات جاسادى.
نادەجدا لۋشنيكوۆا 1940 جىلى 22 قاراشادا الماتى وبلىسى، قاراساي اۋدانى، شامالعان اۋىلىندا تۋعان. قازاق اراسىندا تاربيەلەنىپ، قازاقشا وقىپ، ءبىلىم العان. 1961 جىلى م.مامەتوۆا اتىنداعى پەدۋچيليششەنى (قىزىلوردا)، 1969 جىلى اباي اتىنداعى قازاق پەداگوگيكالىق ينستيتۋتى فيلولوگيا فاكۋلتەتىنىڭ قازاق ءبولىمىن ءبىتىردى. ولەڭدى جازىپ تا، سۋىرىپ تا شىعارادى. 1963 جىلى قىزىلورداداعى وبلىستىق ايتىسقا قاتىسىپ، جۇلدەگەر بولدى. شىمكەنتتىك قالدىبەك الىقۇلوۆپەن ايتىسى كينوعا ءتۇسىرىلدى («ايتىس»، رەجيسسەرى ت.دۇيسەبايەۆ). جامبىل اۋداندىق (1965، 1978)، الماتى وبلىستىق (1977، 1979) ايتىستارىنا قاتىسىپ، ارىپتەستەرىن جەڭدى. 1963–1985 جىلدارى گازەتتە ادەبي قىزمەتكەر، باسپا رەداكتورى، مەكتەپتە ءمۇعالىم بولعان. 1985 جىلدان جامبىل اۋدانىنداعى ۇمبەتالى كارىبايەۆ مۇراجايىنىڭ ديرەكتورى. قازاقستاننىڭ ەڭبەك سىڭىرگەن مادەنيەت قايراتكەرى، قازاقستان كومسومولى سىيلىعىنىڭ لاۋرەاتى، «قۇرمەت» وردەنىنىڭ يەگەرى، جامبىل اۋدانىنىڭ قۇرمەتتى ازاماتى.
