"قازاقتەلەكوم" Altel مەن Tele2 ۇيالى بايلانىس وپەراتورلارىن ساتاتىنى بەلگىلى بولدى، - دەپ حابارلايدى Dalanews.kz.
ۇلتتىق ەكونوميكا مينيسترلىگى ۇكىمەتتىڭ "جەكەشەلەندىرۋدىڭ 2021-2025 جىلدارعا ارنالعان كەيبىر ماسەلەلەرى تۋرالى" قاۋلىسىنا تۇزەتۋلەر جوباسىن جاريالادى. بۇل ماڭىزدى قۇجاتتا "موبايل تەلەكوم-سەرۆيس" ج ش س جەكە ينۆەستورعا بەرىلەتىنى ايتىلادى.
ال "موبايل تەلەكوم-سەرۆيس" ج ش س دەپ وتىرعانىمىز - Tele2 جانە ALTEL ۇيالى وپەراتورلارىن بىرىكتىرەتىن كومپانيا. "موبايل تەلەكوم-سەرۆيس "قازاقتەلەكوم" كومپانياسىنا تيەسىلى. بيىلعى 1 قاڭتارداعى جاعداي بويىنشا "قازاقتەلەكوم" اكسيالارىنىڭ 80 پايىزدان استامىن "سامۇرىق-قازىنا" مەملەكەتتىك ۇلتتىق ءال-اۋقات قورى يەلەنەدى.
ال ءتيىستى قۇجات 14 اقپانعا دەيىن قوعامدىق تالقىلاۋدا بولادى.
بۇل شەشىم تۋرالى 2022 جىلى حابارلاندى. ال بىلتىر جازدا مينيستر باعدات مۋسين "كسەلل" اق 2023 جىلدىڭ سوڭىنا دەيىن "قازاقتەلەكوم" يەلىگىنەن شىعاتىنىن ايتتى. بۇل كەزدە ساتىپ الۋعا قىزىققان ەكى ساتىپ الۋشى بارى حابارلاندى. الايدا بۇل قانداي كومپانيالار ەكەنى ءالى بەلگىسىز.
بىلتىر جىل سوڭىندا مۋسين 2024 جىلدىڭ ىشىندە "قازاقتەلەكوم" بۇل تاپسىرمانى ورىنداۋعا ءتيىس ەكەنىن تاعى ايتتى.
ايتا كەتەيىك، ازىرگە Beeline-نان بولەك ۇيالى تەلەفون وپەراتورلارى قازاقتەلەكومعا تيەسىلى.
