قازاقتاردى باسقارۋ تۋرالى كىتاپ ساتىلىمنان الىنىپ تاستالدى، - دەپ حابارلايدى Dalanews.kz.

بۇل تۋرالى AmalBooks باسپاسىنىڭ نەگىزىن قالاۋشى، باسپاگەر باقىتجان بۇقارباي ينستاگرام-پاراقشاسىندا ايتتى. ونىڭ سوزىنشە، "كاك ۋپراۆليات كازاحامي؟" كىتابى بۇكىل ساتۋ نۇكتەسىنەن الىنىپ تاستالعان. 

"قۇرمەتتى قازاق ەلى، بۇگىن تاڭعى 9:00-دەن 12:00-گە دەيىن "كومپوس" جانارماي بەكەتتەرىنە بارىپ، ءوزىم جەكە سول جەردە بولدىم. ۆيدەونى كورىپ كەلگەن جاناشىر اعايىندارىمىز، باۋىرلارىمىز، اعالارىمىز بار، ارقايسىسىمەن جەكە-جەكە وسى ۋاقىت ارالىعىندا كەزدەسىپ، ماقسات-مۇددەلەرىن ءتۇسىندىرىپ، جەتكىزىپ ايتتىم. ءبىراق كىتاپ شىعاراتىن باسپاگەر بولعان سوڭ ءبىز كەرى بايلانىسپەن دە جۇمىس ىستەۋىمىز كەرەك جانە ەشقاشان ءبىز ءوزىمىزدى حالىقتان بيىك قويعان جوقپىز. سوندا كەلۋشىلەردىڭ پىكىرىن، كەرى بايلانىسىن تىڭداپ وتىرساق، ولارعا ۇناماعانى مۇقابا بولىپ تۇر. بىردەن كىتاپتىڭ مازمۇنىن تۇسىنبەي قالاسىڭ دەيدى. "مىنا جازىلعان، سەن ايتىپ وتىرعان نارسەلەر دۇرىس تا شىعار، ءبىراق مىنا مۇقابا سونى اشپايدى، سوندىقتان وسىنداي رەاكسيامىز بولىپ جاتىر" دەپ ايتتى. سوندىقتان ءبىز بۇگىن بۇكىل ساتۋ نۇكتەلەرىنەن بۇل كىتاپتى تۇگەل الىپ تاستادىق. ءقازىر ەشبىر جەردە بۇل كىتاپ ساتىلىمدا جوق"، - دەدى باسپاگەر.

ەسكە سالايىق، "قازاقتاردى قالاي باسقارۋ كەرەك؟" اتتى كىتاپ جەلىدە داۋ تۋدىرعان بولاتىن.

كىتاپ دۇكەن سورەلەرىندە ساتىلىپ تۇرعانى جايلى بەلگىلى بلوگەر، مەديا پروديۋسەر نۇرقوجا ەرسايىن ايتتى.

"دوستار، مىناۋ نە ەندى؟ قاراڭىزدارشى. تۋرا الماتىنىڭ تورىندە "كاك ۋپراۆليات كازاحامي؟" دەگەن كىتاپتى قويىپ قويىپتى. كىتاپتىڭ قىسقاشا تاريحىن ايتىپ بەرەيىن. بۇل بارىنە بەلگىلى كىتاپ. يۆان كيريللوۆ دەگەن وڭباعان كىسى 1734 جىلى شىعارعان، ياعني قازاقتار جوڭعارلاردىڭ اسەرىنەن قۇلدىراپ، رەسەيگە قوسىلا باستاعان كەزدە يۆان كيريللوۆ دەگەن ادام وسى كىتاپتى جازىپ شىققان. مۇنى سىرتىنىڭ وزىندە جازىپ قويعان. قازاق پەن قىرعىز رۋلارىن بىر-بىرىنەن ءبولۋ، اجىراتۋ ارقىلى ولاردى باعىندىرىپ، ولاردى تىزە بۇكتىرىپ، رەسەيگە باعىندىرۋدىڭ تىكەلەي نۇسقاۋلىعى. سول كىتاپ ەندى ساتىلىپ جاتىر. سۋرەتىندە دە ءبىر حان ورىس وفيسەرلەرىنىڭ الدىندا باس ءيىپ، باعىنىپ جاتىر"، - دەيدى بلوگەر.

ديزاينەر، ساۋلەتشى ەلزات مۇقاشيەۆتىڭ سوزىنشە، كىتاپتى سورەدەن كورگەن ادامدار ونى سۋرەتكە ءتۇسىرىپ، مازاق ەتكەندەي بولعان. 

"وسىنى ساتۋعا رۇقسات بەرگەن ادامنىڭ نامىسى بار ما دەگەن سۇراق تۋادى"، - دەيدى مۇقاشيەۆ. 

نۇرقوجا ەرسايىننىڭ سوزىنشە، كىتاپ تۋريستەر كوپ توقتايتىن جانارماي قۇيۋ بەكەتىنىڭ دۇكەنىندە ساتىلىپ تۇرعان.