مۇحتار اۋەزوۆ اتىنداعى قازاق ۇلتتىق دراما تەاترىنىڭ اكتەرى، "قۇرمەت" وردەنىنىڭ يەگەرى ءۇسىپحان سەيتىمبەت دۇنيەدەن ءوتتى، دەپ حابارلايدى، Dalanews.kz.
"ول سانالى عۇمىرىن مۇحتار اۋەزوۆ اتىنداعى قازاق ۇلتتىق دراما تەاترىنا ارناپ، تۋما تالانتى، تابيعي دارىنى ارقاسىندا ءار جانردا ەستە قالارلىق سان قىرلى وبرازدار گالەرەياسىن جاسادى. حالىق جادىندا بويىنا بارلىق ونەردى قابىستىرا بىلگەن شەبەر اكتەر رەتىندە قالدى.
مارقۇمنىڭ وتباسى مەن جاقىندارىنا، بۇكىل تەاتر ۇجىمىنا قايعىرىپ، كوڭىل ايتامىز. جاتقان جەرى جايلى بولىپ، جانى پەيىشتە شالىقتاسىن. ارتىندا قالعان ۇرپاقتارىنا ۇزاق عۇمىر بەرسىن"، - دەپ جازدى مۇحتار اۋەزوۆ اتىنداعى قازاق ۇلتتىق دراما تەاترىنىڭ باسپا ءسوز قىزمەتى.
اكتەر مۇحتار اۋەزوۆ اتىنداعى قازاق مەملەكەتتىك اكادەميالىق دراما تەاتر ساحناسىندا م.اۋەزوۆتىڭ "ابايىندا" نارىمبەت پەن دولگوۆتى، ي.ساپاربايدىڭ "سىعان سەرەناداسىندا" باروندى، شەكسپيردىڭ "رومەو مەن دجۋلەتتاسىندا" جۇرگىزۋشىنى جانە تاعى دا باسقا كەيىپكەرلەردى سومداعان. ول تاۋەلسىزدىكتىڭ قايتا ورالۋىنا سەبەپشى بولعان جەلتوقسان وقيعاسىنا قاتىسقان. ونەردىڭ ءبىر تارماعى سانالاتىن انشىلىكتى جانىنا سەرىك ەتكەن.
