پاندەميا كەزىندە قۇربان شالىپ، قۇلشىلىق جاساۋ وڭاي بولماسى انىق. دەسەك تە وتكەن جىلدان بەرى قازاقستان ءدىني باسقارماسى قاراپايىم حالىقتىڭ سانيتارلىق تالاپتاردى ساقتاي وتىرىپ، قۇربان شالۋدىڭ ءقاۋىپسىز جول ۇسىنىپ، بۇل باعىتتا ءبىرشاما ىس-تاجىريبە جيناعانى بەلگىلى. ءوز كەزەگىندە باس ءمۇفتي ناۋرىزباي قاجى تاعان ۇلى قۇربان ايتتا ورىندالاتىن نەگىزگى ىزگى امالدىڭ ءبىرى – قۇربان شالۋ ەكەنىن اتاپ ءوتتى. ءۇش كۇن مەرەكە كەزىندە جاماعات قۇربان شالۋ ءۇشىن مال ساتىپ الۋ ءۇشىن بازارلاردى ارالاپ سابىلۋى مۇمكىن. مىناداي قيىن كەزەڭدە ادامداردىڭ كوپ جينالۋىنا رۇقسات جوق ەكەنىن ەسكەرسەك، قۇربان شالۋ كەزىندە ءبىرقاتار قيىندىقتاردىڭ تۋىندايتىنى بەلگىلى. وسى قيىندىقتاردى ەڭسەرۋ ءۇشىن قازاقستان مۇسىلماندار ءدىني باسقارماسى وتكەن جىلدان بەرى قۇربان ايت مەرەكەسىن اتاپ ءوتۋدىڭ وزىندىك الگوريتمىن قالىپتاستىردى دەسەك بولادى.
– قازاقستانداعى شارۋا قوجالىقتارىنىڭ قوجايىندارىن ۇلىق مەيرام – قۇربان ايتتىڭ قۇرمەتىنە مال قۇنىن شارىقتاتپاي، حالىققا وڭتايلى باعانى ۇسىنۋعا شاقىرامىن. سونىمەن قاتار، بارشا كاسىپكەردى تۇرعىندار كۇندە تۇتىناتىن الەۋمەتتىك ماڭىزى بار ازىق-تۇلىك باعاسىنا مۇمكىندىگىنشە جەڭىلدىك جاساۋعا ۇندەيمىن، – دەدى ناۋرىزباي قاجى تاعان ۇلى.
ءمۇفتيدىڭ ءسوزى ورىندا بىزدەگى شارۋالار ءدال قۇربان ايت قارساڭىندا مالدىڭ باعاسىن ءوسىرىپ جەبەرەتىنى جاسىرىن ەمەس. بۇل رەتتە جەرگىلىكتى جەردەگى يمامداردىڭ قاسيەتتى مەرەكە كەزىندە قوي باعاسىن قىمباتتاتپاۋعا قاتىستى ۇگىت-ناسيحات جۇمىستارىن جۇرگىزۋدىڭ ماڭىزى زور. قۇربان ايت جالپى مۇسىلماندار مەيىرىمدىلىككە، جومارتتىققا، قايىرىمدىلىققا، قاناعاتشىلىققا ۇندەيتىن مەرەكە دەسەك بولادى
جاراتۋشى يەمىز قۇراندا: «وزدەرىڭ جاقسى كورگەن نارسەنى اللا جولىنا جۇمسامايىنشا يگىلىككە جەتپەيسىڭدەر” (“ءال-يمران” سۇرەسى، 92-ايات) دەپ بايانداعان. ساۋاپتار ەسەلەنىپ جازىلاتىن ساتتەردە اللا رازىلىعى ءۇشىن ەلدىڭ جاعدايىن ەسكەرىپ، مال باعاسىنا جەڭىلدىك جاساۋدىڭ ماڭىزى زور. قۇربان ايت كەزىندە ەل ازاماتتارى تەك قانا قوي ساتىپ الىپ، ونىڭ ەتىن تاراتپايدى. سونىمەن قاتار مەرەكەلىك داستارحاندى جايىپ، ءبىر-بىرىنىڭ ۇيىنە ايتشىلايتىنىن ەسكەرسەك، بازاردا ازىق-تۇلىك ساۋدالاپ تۇرعان ازاماتتاردىڭ دا بۇل ساۋدالاپ تۇرعان زاتتارىنىڭ باعاسىن شامادان تىس وسىرمەي، حالىقتىڭ قالتاسى كوتەرەتىندەي دەڭگەيدە ۇستاپ تۇرۋى كەرەك-اق. ويتكەن قازىرگى تاڭدا قۇربان ايت ءار وتباسىعا قۋانىش پەن مەرەكەلىك كوڭىل كۇي سىيلايتىن وتباسىلىق مەرەكەگە اينالىپ كەلەدى. ءوز كەزەگىندە باس ءمۇفتي وسى ماسەلەنى دە باسا ايتىپ، ەل ازاماتتارىڭ بىر-بىرىنە قايىرىمدى بولۋعا شاقىردى.
ءوز ۇندەۋىندە حازىرەت قۋاڭشىلىقتان زارداپ شەككەن وڭىرلەردەگى شارۋالارعا قولداۋ كورسەتۋ ءۇشىن «قيىندىقتا ەل بىرگە» اتتى قايىرىمدىلىق اكسياسىن باستاعانىن مالىمدەدى. اكسيا اياسىندا قىزىلوردا، ماڭعىستاۋ وبلىستارىنا جەم-شوپ جونەلتىلەدى.
باس ءمۇفتي قازاقستاندىقتاردى وسى يگى ىسكە ۇلەس قوسۋعا شاقىردى.
بيىل بارشا مۇسىلماننىڭ ۇلىق مەرەكەسى – قۇربان ايت 20-22 شىلدەگە ءتۇسىپ تۇر. قۇربان ايتتىڭ ءبىرىنشى كۇنى 20 شىلدە – دەمالىس.
