ەڭبەك مينيسترلىگى وتاندىق كاسىپورىنداردىڭ قازاقستاندىقتارعا جالاقى بويىنشا 3،3 ميلليارد تەڭگە بەرەشەگى بارىن مالىمدەدى، دەپ حابارلايدى Dalanews.kz.

مەملەكەتتىك ەڭبەك ينسپەكتورلارى رەسپۋبليكانىڭ 259 كاسىپورنى 14،9 مىڭ جۇمىسكەرگە 3،3 ميلليارد تەڭگەدەن استام سوماعا جالاقى تولەمەگەنىن انىقتادى. جالاقى بويىنشا بەرەشەگى بار كاسىپورىنداردىڭ باسشىلارىنا ورىنداۋعا مىندەتتى 222 ۇيعارىم بەرىلىپ، 34،6 ميلليون تەڭگەدەن استام سوماعا ايىپپۇل سالىندى.

سونىمەن قاتار ءتۇرلى ۇيىمداردا جۇرگىزىلگەن تەكسەرۋلەر بارىسىندا 5،6 مىڭعا جۋىق ەڭبەك قۇقىعىنىڭ بۇزىلعانى بەلگىلى بولدى. قابىلدانعان شارالاردىڭ ناتيجەسىندە 13،2 مىڭنان استام جۇمىسكەردىڭ قۇقىقتارى قورعالىپ، ولارعا 2،6 ميلليارد تەڭگە تولەندى.

“2024 جىلعى 1 تامىزداعى دەرەكتەر بويىنشا مەملەكەتتىك ەڭبەك ينسپەكتورلارى 4 245 تەكسەرۋ جۇرگىزدى، ونىڭ بارىسىندا 6 772 بۇزۋشىلىق انىقتالدى، ونىڭ ىشىندە: ەڭبەك سالاسىندا – 5 007؛ ەڭبەك قاۋىپسىزدىگى جانە ەڭبەكتى قورعاۋ بويىنشا – 1 703؛ حالىقتى جۇمىسپەن قامتۋ بويىنشا – 62. جۇمىس بەرۋشىلەرگە 2 552 ۇيعارىم بەرىلىپ، 321،9 ميلليون تەڭگە سوماسىنا 2 931 اكىمشىلىك ايىپپۇل سالىندى. قابىلدانعان شارالاردىڭ ناتيجەسىندە 23 مىڭ جۇمىسكەردىڭ ەڭبەك قۇقىعى قورعالدى”، – دەلىنگەن حابارلامادا.

بۇدان بولەك، ەڭبەك زاڭناماسىنىڭ ساقتالۋىنا مەملەكەتتىك باقىلاۋدى قامتاماسىز ەتۋ ماسەلەلەرى ق ر ەڭبەك جانە حالىقتى الەۋمەتتىك قورعاۋ مينيسترلىگىنىڭ ەرەكشە باقىلاۋىندا.