قازاقستاندىقتاردىڭ جەكە دەرەگى تاراپ كەتسە، eGov-تان حابارلاما كەلەدى. بۇل تۋرالى سيفرلىق دامۋ، يننوۆاسيالار جانە اەروعارىش ونەركاسىبى مينيسترلىگى مالىمدەدى، - دەپ حابارلايدى Dalanews.kz.
"العاشقى تالداۋ جۇمىستارى بۇل دەرەكتەر مەملەكەتتىك ەمەس، جەكەمەنشىك جۇيەلەردەن الىنۋى مۇمكىن ەكەنىن كورسەتىپ وتىر. مەملەكەتتىك جۇيەلەردەن جەكە دەرەكتەر تاراعان جوق، حاكەرلىك شابۋىلدار سالدارىنان اقاۋ دا تىركەلگەن جوق"، - دەدى مينيسترلىك وكىلدەرى.
ۆەدومستۆو مالىمەتىنشە، تەكسەرىس تولىق اياقتالعانعا دەيىن قانداي دا ءبىر قورىتىندى جاساۋعا ەرتە.
"ازاماتتىڭ جەكە دەرەكتەرى تاراپ كەتكەن مالىمەتتەر اراسىندا بولسا، بۇل تۋرالى ەلەكترون ۇكىمەت پورتالى (eGov) ارقىلى جەكە كابينەتىنە حابارلاما جولدانادى"، - دەپ جازىلعان مالىمەتتە.
ايتا كەتەيىك، 16 ميلليوننان اسا جازبا تاراپ كەتكەن. بۇل كورسەتكىش ەل حالقىنىڭ باسىم بولىگىن قامتيدى. تاراپ كەتكەن دەرەكتەردە تۇرعىنداردىڭ تەگى، اتى، اكەسىنىڭ اتى، جىنىسى، تۋعان كۇنى، جسن، مەكەن جايى، تەلەفون نومىرلەرى (ۇيالى، ءۇي جانە جۇمىس تەلەفوندارى)، ازاماتتىعى، ۇلتى جانە باسقا مالىمەتتەر كەزدەسەدى.
