قارجىلىق مونيتورينگ اگەنتتىگى (قما) اقپاراتتىق كەڭىستىكتە زاڭعا قايشى كونتەنتتىڭ بار-جوعىن تەكسەرۋ ەرەجەلەرىن ازىرلەدى. قۇقىق بۇزۋشىلارعا كونتەنتتى بۇعاتتاۋ، اكىمشىلىك نەمەسە قىلمىستىق جاۋاپكەرشىلىك قاراستىرىلۋى مۇمكىن، دەپ حابارلايدى Dalanews.kz.

ءتيىستى بۇيرىق جوباسى «اشىق نقا» پورتالىندا جاريالاندى. قۇجاتقا سايكەس، قما ءوز قۇزىرەتى شەڭبەرىندە اقپاراتتىق كەڭىستىكتى تەكسەرىپ، زاڭعا قايشى كونتەنتتى انىقتايدى. 

نەنى تەكسەرەدى؟

تەكسەرۋ بارىسىندا اشىق دەرەككوزدەردە جاريالانعان اقپارات تالدانادى. اتاپ ايتقاندا:
– ينتەرنەت-رەسۋرستار؛
– الەۋمەتتىك جەلىلەر؛
– مەسسەندجەرلەر؛
– بۇقارالىق اقپارات قۇرالدارى؛
– وزگە دە اقپاراتتىق-كوممۋنيكاسيالىق پلاتفورمالار.

سونىمەن قاتار اگەنتتىك مونيتورينگ جەكە دەرەكتەر جانە ولاردى قورعاۋ تۋرالى زاڭ تالاپتارىن ساقتاي وتىرىپ جۇرگىزىلەتىنىن مالىمدەدى.

ەگەر زاڭعا قايشى كونتەنت انىقتالسا، قما مىناداي شارالار قابىلدايدى:

– ەگەر قىلمىستىق قۇقىق بۇزۋشىلىق بەلگىلەرى بولسا - ءىس قىلمىستىق-پروسەستىك زاڭناماعا سايكەس قارالادى؛
– ەگەر قىلمىستىق قۇقىق بۇزۋشىلىق بەلگىلەرى بولماسا - ماتەريالدار اكىمشىلىك جاۋاپكەرشىلىككە تارتۋ ءۇشىن ءتيىستى ورگاندارعا جولدانادى؛
– ەگەر تەلەكوممۋنيكاسيا جەلىلەرىندە قازاقستان زاڭدارىمەن نەمەسە كۇشىنە ەنگەن سوت شەشىمدەرىمەن تىيىم سالىنعان نە شەكتەلگەن ماتەريالدار انىقتالسا، ولاردى بۇعاتتاۋ ءۇشىن ماسس-مەديا سالاسىنداعى ۋاكىلەتتى ورگانعا اقپاراتتىق جۇيە ارقىلى حابارلاما جىبەرىلەدى.

مۇنداي حابارلاما جولدانعاندا قارجىلىق مونيتورينگ اگەنتتىگى اقپاراتتىق جۇيەدە بارلىق دەرەكتەردى تولىق كورسەتۋگە مىندەتتى. ونىڭ ىشىندە:

– ەنگىزىلگەن مالىمەتتەردىڭ زاڭدىلىعى مەن نەگىزدەمەسى؛
– زاڭعا قايشى ماتەريالداردى راستايتىن سكرينشوتتار.

«اشىق نقا» پورتالىندا جاريالانعان بۇيرىق جوباسىندا بۇل ەرەجەلەر وتكەن جىلى پارلامەنت قابىلداعان قۇقىق بۇزۋشىلىقتاردىڭ الدىن الۋ تۋرالى زاڭ اياسىندا ازىرلەنگەنى ايتىلعان.

زاڭ جوباسى ماجىلىستە قارالعان كەزدە زاڭعا قايشى كونتەنتتى ورنالاستىرعانى جانە تاراتقانى ءۇشىن اكىمشىلىك جاۋاپكەرشىلىك ەنگىزۋ ماسەلەسى كوتەرىلگەن. ونلاين-پلاتفورمالار جانە ونلاين-جارناما تۋرالى زاڭعا سايكەس، زاڭعا قايشى كونتەنتكە مىناداي ۇگىت-ناسيحات نەمەسە شاقىرۋلار جاتادى:

– كونستيتۋسيالىق قۇرىلىستى كۇشپەن وزگەرتۋگە، قازاقستان رەسپۋبليكاسىنىڭ تۇتاستىعىن بۇزۋعا شاقىرۋ؛
– مەملەكەتتىڭ قاۋىپسىزدىگىن السىرەتۋ؛
– سوعىسقا شاقىرۋ؛
– الەۋمەتتىك، ناسىلدىك، ۇلتتىق، ءدىني، تاپتىق جانە رۋلىق ارتىقشىلىقتى ناسيحاتتاۋ؛
– قاتىگەزدىك پەن زورلىق-زومبىلىقتى، ءسۋيسيدتى، پورنوگرافيانى، ەسىرتكى قۇرالدارىن، پسيحوتروپتىق زاتتاردى، ولاردىڭ انالوگتارى مەن پرەكۋرسورلارىن ناسيحاتتاۋ؛
– سەپاراتيزم، الاياقتىق يدەيالارىن تاراتۋ، ۇلتارالىق جانە كونفەسسياارالىق كەلىسىمدى بۇزۋعا ىقپال ەتەتىن اقپارات.

سونىمەن قاتار قازاقستاننىڭ مەملەكەتتىك تاۋەلسىزدىگى مەن اۋماقتىق تۇتاستىعىنا كۇمان كەلتىرەتىن مالىمدەمەلەر، مەملەكەتتىك قۇپيانى نەمەسە زاڭمەن قورعالاتىن وزگە دە قۇپيالاردى اشاتىن اقپارات جانە زاڭدارمەن تىيىم سالىنعان باسقا دا مالىمەتتەر زاڭعا قايشى كونتەنتكە جاتادى.

زاڭ جوباسى پارلامەنتكە تۇسكەننەن كەيىن الەۋمەتتىك جەلىلەردە تىيىم سالىنعان كونتەنتتى جاريالاعانى ءۇشىن عانا ەمەس، ونى رەپوست جاساعانى ءۇشىن دە جاۋاپكەرشىلىك قاراستىرىلۋى مۇمكىن دەگەن پىكىرلەر تارادى.