قازاقستاندا كوپتەگەن وتباسىلار قارجىلىق ماسەلەلەردى شەشۋ ءۇشىن نەسيە الۋعا ءماجبۇر بولادى. كەيدە وسىنداي جاعدايلاردا ادام ەرىكسىز قارىزعا باتادى. ەگەر اي سايىنعى تولەم وتباسىنىڭ جالپى تابىسىنان اسىپ كەتسە، نە ىستەۋ كەرەك؟ بۇل سۇراققا «قارىزسىز قوعام» ۇيىمىنىڭ زاڭگەرى جاۋاپ بەردى،– دەپ حابارلايدى Dalanews.kz
الماتى وبلىسىنان شىققان ەرلى-زايىپتىلار ءۇي سالۋ ءۇشىن بەس بانك پەن مقۇ-دان 22 ميلليون تەڭگەدەن استام قارىز العان. سول سەبەپتى ءار اي سايىن ولار شامامەن 1 ميلليون تەڭگە تولەۋگە ءماجبۇر بولدى، بۇل وتباسى ءۇشىن ۇلكەن قارجىلىق جۇكتەمە.
ايەلى 160 مىڭ تەڭگە جالاقى السا، كۇيەۋى تۇراقتى تابىسقا يە بولماي، ۋاقىتشا جۇمىس ىستەپ ءجۇر. قيىن جاعدايعا تاپ بولعان جۇپ «قارىزسىز قوعام» زاڭگەرلەرىنە جۇگىندى.
زاڭگەرلەر قارىزداردى رەسترۋكتۋريزاسيالاۋ بويىنشا بىرنەشە رەت باس تارتىلعان ءوتىنىشتى جۇزەگە اسىرىپ، اي سايىنعى تولەمدى 550 مىڭ تەڭگەگە دەيىن ازايتتى. وسىلايشا، ەرلى-زايىپتىلار ءۇش مقۇ قارىزىن مەرزىمىنەن بۇرىن وتەي الدى.
جوبا زاڭگەرلەرى تاعى ءبىر كۇردەلى جاعدايدا تابىسقا جەتتى. كوپبالالى اكە مەن ايەلى تۇتقىندالعان شوتتارى سالدارىنان جۇمىسقا ورنالاسا الماي، تەك جاردەماقى مەن مەكەنجاي بويىنشا كومەكپەن ءومىر ءسۇرىپ جاتتى.
نەلىكتەن ولاردىڭ شوتتارى بۇعاتتالدى؟ سەبەبى، ەر ادامدا 1 584 238،33 تەڭگە سوماسىندا 6 قارىز بولعان، ال مەرزىمى ءوتىپ كەتكەن كۇندەر سانى 1252 كۇندى قۇراعان. ونىڭ قاتىسىنا ورىنداۋشى ءوندىرىس قوزعالعان.
زاڭگەرلەر بۇعاتتاۋدى الىپ تاستاۋ جانە قارىزداردى رەسترۋكتۋريزاسيالاۋ بويىنشا جۇمىس باستاعان. ناتيجەسىندە قارىزدىڭ ءبىر بولىگى جويىلىپ، اي سايىنعى تولەم 18 مىڭ تەڭگەگە دەيىن تومەندەدى. سونىمەن قاتار، ەر ادام «قارىزسىز قوعام» قارجىلىق ساۋاتتىلىق كۋرسىن وتكەن.
ايتا كەتەيىك، «قارىزسىز قوعام» جوباسى اياسىندا قازاقستان ازاماتتارى پروبلەمالى نەسيەلەر بويىنشا تەگىن زاڭگەرلىك كەڭەس الا الادى جانە قارجىلىق ساۋاتتىلىق ساباقتارىنا قاتىسا الادى. بارلىق اقپارات Qogamfin.kz سايتىندا قولجەتىمدى.
