ومبىنىڭ «اۆانگارد» كومانداسى استانادا قازاقستاننىڭ «بارىسىنان» 2:6 ەسەبىمەن جەڭىلگەننەن كەيىن، جەلى قولدانۋشىلارى ماچ الدىنداعى رەسەيلىك حوككەيشىلەردىڭ استانادا شوپينگ جاساعانىن قىزۋ تالقىلاپ جاتىر، دەپ حابارلايدى Dalanews.kz.

كەشە، 16 قازاندا، قحل اياسىنداعى ماچتا قازاقستاندىق «بارىس» رەسەيلىك «اۆانگاردتى» 6:2 ەسەبىمەن ويسىراتا جەڭدى. مۇز يەلەرى اسىرەسە ءۇشىنشى كەزەڭدە كوزگە ءتۇسىپ، قارسىلاستىڭ قاقپاسىنا جاۋاپسىز ءتورت شايبا سوقتى.

الايدا جانكۇيەرلەردىڭ الەۋمەتتىك جەلىلەردەگى نازارىن تەك ماچ ناتيجەسى عانا ەمەس، ومبىدان كەلگەن قوناقتاردىڭ ويىن الدىنداعى ارەكەتى دە اۋداردى.

ەڭ كوپ تالقىلانعان جايتتاردىڭ ءبىرى- «اۆانگارد» كومانداسىنىڭ قورعاۋشىسى دامير شاريپزيانوۆ جاريالاعان ۆيدەو بولدى. وندا حوككەيشى ساتىپ العان زاتتارىنىڭ سومكەلەرىن كورسەتىپ، بىلاي دەيدى:

«استانا- رەسەيدە جوق دۇكەندەردى ارالاپ، ساۋدا جاساۋعا تاماشا مۇمكىندىك. نەگىزىنەن، ارينە، بالالارعا بىردەڭە الدىق. ءبىرىنشى سومكە دايىن. ارينە، ZARA- نىڭ بالالار ءبولىمى. سۋپەرقاھارمانداردى الىپ جاتىرمىز. سەمەن سەمەنىچ مۇندا تاڭداپ جاتىر»،- دەيدى ول ۆيدەودا.