پسيحوتروپ زاتتاردىڭ انالوگتارىن ساتۋ ماقساتىندا ساقتاعان قازاقستاندىق تۇركيادان ەكستراديسيالاندى، - دەپ حابارلايدى Dalanews.kz باس پروكۋراتۋراعا سىلتەپ.
قازاقستان رەسپۋبليكاسىنىڭ باس پروكۋراتۋراسى مەن ق ر ءىىم ينتەرپولىنىڭ قىزمەتكەرلەرى قازاقستان رەسپۋبليكاسى سىرتقى ىستەر مينيسترلىگىنىڭ كومەگىمەن تۇركيا رەسپۋبليكاسىنان اسا ءىرى مولشەردە پسيحوتروپتىق زاتتاردىڭ انالوگتارىن ساتۋ ماقساتىندا زاڭسىز ساقتاعانى ءۇشىن قىلمىستىق جاۋاپكەرشىلىككە تارتۋ ماقساتىندا قازاقستان ازاماتىن ەكستراديسيالادى.
استانادا 2022 جىلى جەلتوقساندا پوليسيا قىزمەتكەرلەرى جەدەل ىزدەستىرۋ شارالارىن جۇرگىزۋ بارىسىندا ودان 17 قاپشىق، اسا ءىرى كولەمدە مەتكاتينون تاركىلەدى. قىلمىس جاساعاننان كەيىن كۇدىكتىنىڭ جاسىرىنۋىنا بايلانىستى وعان حالىقارالىق ىزدەۋگە جاريالاندى.
"بيىل قازاندا كۇدىكتى انتاليا قالاسىندا ۇستالىپ، كەيىن قازاقستان رەسپۋبليكاسىنا ەكستراديسيالاندى"، - دەپ جازىلعان حابارلامادا.
قازىرگى ۋاقىتتا كۇدىكتى ۋاقىتشا ۇستاۋ يزولياتورىنا قامالدى.
ايتا كەتەيىك، بۇل قىلمىستى جاساعانى ءۇشىن مۇلكى تاركىلەنىپ، 10 جىلدان 15 جىلعا دەيىنگى مەرزىمگە باس بوستاندىعىنان ايىرۋ جازاسى قاراستىرىلعان.
