قازاقستاننىڭ روبوتوتەحنيكا ۇلتتىق قۇراماسى 2025 جىلعى پاناما-سيتي قالاسىندا وتكەن FIRST Global Challenge الەمدىك وليمپياداسىندا ءتورتىنشى رەت قاتارىنان جەڭىسكە جەتتى. الماتى قالاسىنداعى NIS مەكتەبىنىڭ وقۋشىلار كومانداسى ءابسوليۋتتى چەمپيون اتانىپ، 190 ەلدىڭ قاتىسۋشىلارىنان وزىپ شىقتى، دەپ حابارلايدى Dalanews.kz.

قازاقستاندىقتار ءتۋرنيردىڭ ەڭ جوعارعى ەكى جۇلدەسىن جەڭىپ الدى: Grand Challenge Award — جارىستىڭ باستى كۋبوگى جانە Albert Einstein Award — كورنەكتى ينجەنەرلىك شەشىمدەر، يننوۆاسيالار جانە كوماندالىق جۇمىس ءۇشىن بەرىلەتىن سىيلىق.

ۇلتتىق قۇرامانىڭ ساپىندا 9–10 سىنىپ وقۋشىلارى راشات دوسىمجان، داۋلەت ءىلياس، اليحان ورىنباساروۆ، ماديار اسەت ۇلى جانە نۋراسىل تۋرسىمبايەۆ سىنعا ءتۇستى. ولاردى دايىنداعان باپكەرلەر: دۋلات بايتۋلەنوۆ، نۋرداۋلەت دوسماگامبەت جانە اسىلبەك مۋرزاحمەتوۆ.

پاناماداعى جەڭىس قازاقستاننىڭ بۇعان دەيىنگى جەڭىستى جولىنىڭ ءداستۇرلى جالعاسى بولدى. ەلىمىزدىڭ دارىندى جاستارى جەنيەۆادا (2022)، سينگاپۋردا (2023) جانە گرەسيادا (2024) جەڭىسكە جەتكەن. وسىلايشا، قازاقستان FGC تاريحىندا ءتورت مارتە چەمپيون اتانعان جالعىز مەملەكەتكە اينالدى.

بيىلعى جارىستىڭ تاقىرىبى — «Eco-Equilibrium» — بيولوگيالىق ارتۇرلىلىكتى ساقتاۋ جانە ەكولوگيالىق تەپە-تەڭدىك. قازاقستاندىق روبوت رەكوردتىق دالدىك پەن تيىمدىلىكتى كورسەتتى، ەلدىڭ جاھاندىق STEM ارەناسىندا ءوسىپ كەلە جاتقان تەحنولوگيالىق الەۋەتىن تانىتتى.