قازاقستاندىق بانكتەر بيرجادان تىس رەسەيدىڭ ءرۋبلىن ساتىپ الۋدى كۇرت ارتتىرعان. ءبىرىنشى كرەديتتىك بيۋرو مالىمەتىنشە، قازان ايىندا جالپى سوماسى 71،6 ملرد رۋبل ساتىپ الىنعان، بۇل مامىلەلەردە كورسەتىلگەن ورتاشا باعام بويىنشا شامامەن 361،6 ملرد تەڭگە بولادى. ونىڭ نەگىزگى بولىگى - 67،9 ميلليارد رۋبل رەزيدەنت ەمەس بانكتەردىڭ جۇرگىزگەن وپەراسيالارىنا تيەسىلى، دەپ حابارلايدى Dalanews.kz.
"وتكەن ايمەن سالىستىرعاندا ساتىپ الىنعان ءرۋبلدىڭ جالپى كولەمى 3،6 ەسە ءوستى، ال قاڭتار-قىركۇيەك ايلارىندا تىركەلگەن ورتاشا دەڭگەيدەن التى ەسەگە جۋىق ايىرما بار. قازىرگىدەن دە كوپ كولەم سوڭعى رەت 2022 جىلدىڭ ءساۋىرى مەن جەلتوقسان ايلارىندا تىركەلگەن، ءبىراق ول كەزدەگى جاعداي الدەقايدا تۇسىنىكتى بولاتىن. قازاقستانداعى رەسەيلىك بانكتەردىڭ ەنشىلەس كومپانيالارىن ءىلىپ كەتكەن سانكسيا اياسىندا مۇنداي وپەراسيالار "باس ۇيىمنىڭ قولداۋىنان تۇسكەن" اقشالاردى دا قامتىپ ەدى. سانكسياعا دەيىنگى كەزەڭدە، ياعني 2021 جىلى بۇل سوما بار-جوعى 2،5 ملرد ءرۋبلدى قۇراعان"، دەلىنەدى DATA HAB كەلتىرگەن مالىمەتتە.
بيرجادان تىس نارىقتاردا تاعى دا قانداي وزگەشە جاعدايلار بايقالادى؟
رەزيدەنت ەمەس بانكتەر جۇرگىزگەن يۋان ساۋداسى بويىنشا وپەراسيالارداعى سيفر باس اينالدىراتىنداي بولماسا دا ايتارلىقتاي جاندانىپ جاتقانى بايقالادى.
"بۇل سوما 32،9 ملن يۋاندى (شامامەن 2،3 ملرد تەڭگەنى) قۇرادى، ال جىلدىڭ الدىڭعى توعىز ايىندا ءدال وسىنداي مامىلەلەر سوماسى نەبارى 6،3 ملرد يۋانعا دەيىن جەتىپ، 2023 جىلدىڭ ءبۇتىن بويىندا بارلىعى 4،2 ملرد يۋان بولدى. ايتقانداي، بيىلعى جىلى تاعى يۋانعا قاتىستى انومالدى جاعداي شىلدە ايىندا تىركەلدى: ساتىپ الۋ كولەمى، نەگىزىنەن رەزيدەنتتەر اراسىنداعى وپەراسيالار بويىنشا سول كەزدە 3،9 ملرد يۋانعا جەتىپ، ءبىر ايدا 30 ەسەگە دەرلىك ءوسىمدى كورسەتىپ ەدى. ساراپشىلار بۇل بەلسەندىلىك موسبيرجاعا سالىنعان سانكسيادان كەيىن ءبىزدىڭ نارىققا رەسەيلىك كومپانيالاردىڭ لاپ قويۋىمەن بايلانىستى بولۋى مۇمكىن دەگەن بولجامدى ايتقان ەدى"، - دەيدى DATA HAB ساراپشىلارى.
ايتا كەتسەك، ، 7 قاراشادا قازاقستاننىڭ جەتى كومپانياسى باتىستىڭ سانكسياسىنا ۇشىراعانى بەلگىلى بولدى. ۇلتتىق ەكونوميكا ءمينيسترى ۋكرايناعا باسقىنشىلىق جاساعان رەسەيدىڭ اسكەري ونەركاسىبىنە قاجەت جەتكىزۋمەن جانە شىعارۋمەن اينالىسادى دەپ ايىپتالعان بۇل كومپانيالاردى "ءبىر كۇندىك" دەپ اتادى.
