جىل باسىنان بەرى قازاقستانداعى بانكتەردىڭ اكتيۆتەرى 7،8 ترلن تەڭگەگە ءوستى. 1 جەلتوقسانداعى جاعداي بويىنشا، بانك اكتيۆتەرىنىڭ كولەمى 59،2 ترلن تەڭگەگە جەتتى (قاڭتار ايىمەن سالىستىرعاندا +15%)،دەپ جازادى Dalanews.kz.
بۇل تۋرالى ۇلتتىق بانك جاريالاعان سالالىق ەسەبىندە قامتىلعان.
بۇل ءوسىمنىڭ ۇشتەن ەكىسىنە جۋىعىن العاشقى ۇشتىك قامتاماسىز ەتتى: Halyk Bank (+2،45 ترلن تەڭگە)، Kaspi Bank (+1،1 ترلن تەڭگە) جانە سكب (+1،36 ترلن تەڭگە). سانكسياداعى رەسەيلىك بانكتىڭ "ەنشىلەس ۇيىمى" ۆتب-قازاقستاندى قوسپاعاندا، ءبىر جىل ىشىندە بارلىق بانك بۇل جاعىنان "پليۋسكە" شىقتى. رەسەيلىك بانكتىڭ ەنشىلەسى 5،2 ملرد تەڭگە اكتيۆىن جوعالتتى.
بانكتەردىڭ نەسيە پورتفەلى 5،1 ترلن تەڭگەگە (+17%) ءوستى. بۇل رەتتە مەرزىمى وتكەن ءۇمىتسىز نەسيەلەردىڭ ۇلەسى بىردەن 863،8 ملرد تەڭگەدەن 1،13 ترلن تەڭگەگە دەيىن ۇشتەن بىرگە ءوستى. بۇل قازاقستاندىق بانكتەردىڭ جالپى نەسيە پورتفەلىنىڭ 3،22%-ىن قۇرايدى (قاڭتاردا 2،89%).
