قازاقستاندا ۆاليۋتا باعامى جازىلعان كوشەدەگى تابلولار رەسمي تۇردە الىنىپ تاستالدى. ەندى ولار تەك ايىرباستاۋ پۋنكتتەرىنىڭ ىشىندە عانا ورنالاسۋى ءتيىس، دەپ حابارلايدى Dalanews.kz.
9 قىركۇيەكتەن باستاپ ۇلتتىق بانكتىڭ قولما-قول شەتەل ۆاليۋتاسىمەن ايىرباس وپەراسيالارىن جۇزەگە اسىرۋ ەرەجەلەرىنە تۇزەتۋ ەنگىزۋ تۋرالى قاۋلىسى كۇشىنە ەندى. بۇل قۇجات 10 شىلدەدە جاريالانىپ، العاشقى رەسمي جاريالانعان كۇننەن باستاپ 60 كۇن وتكەن سوڭ، ياعني 9 قىركۇيەكتە قولدانىسقا ەنگىزىلدى.
ۆاليۋتا ساتىپ الۋ جانە ساتۋ باعامدارى كورسەتىلگەن اقپاراتتىق ستەند ەندى ايىرباستاۋ پۋنكتىنىڭ ىشىندە نەمەسە كاسسانىڭ جانىندا ورنالاسادى.
باعامداردى سىرتتا (عيمارات قاسبەتىندە، توبەسىندە، كوشەدەگى ستەندتەردە) كورسەتۋگە تىيىم سالىنادى. ەرەكشەلىك تەك بيزنەس-ورتالىقتاردا، ۆوكزالداردا، كازينولاردا، اۋەجايلار مەن شەكارا بەكەتتەرىندە ورنالاسقان ايىرباستاۋ ورىندارىنا قاتىستى.
اۆتوماتتاندىرىلعان ايىرباستاۋ پۋنكتتەرىندە باعامدى مونيتوردا كورسەتۋگە رۇقسات ەتىلەدى.
ايتا كەتەيىك، قازاقستاندا ۆاليۋتا باعامى جازىلعان كوشەدەگى تابلولارعا تىيىم سالىنۋى مۇمكىن ەكەنى ناۋرىز ايىندا-اق تالقىلانعان بولاتىن. ول كەزدە ۇلتتىق بانك وكىلدەرى ايىرباستاۋ ورىندارى تابلولاردى قايدا بولسا دا ورنالاستىرا الاتىنىن، ولاردىڭ جول بويىندا، عيمارات قاسبەتتەرىندە، جاياۋ جۇرگىنشىلەر وتكەلدەرىندە، ءتىپتى جول بەلگىلەرىنىڭ قاسىندا تۇرعانىن اتاپ وتكەن. مۇنداي تابلولار رەسمي تۇردە جارناما بولىپ سانالمايدى.
