قازاقستان اۋماعىندا جالعان تەرروريزم تۋرالى حابارلاما تاراتقان وننان استام ءجاسوسپىرىم ۇستالدى، دەپ حابارلايدى Dalanews.kz.
ىشكى ىستەر مينيسترلىگىنىڭ مالىمەتىنشە، 2025 جىلدىڭ قىركۇيەك–قاراشا ايلارىندا تەراكت جانە جارىلىس تۋرالى ادەيى جالعان اقپارات تاراتقان ءبىرقاتار كامەلەتكە تولماعان ءجاسوسىپىرىم ۇستالعان.
9 قىركۇيەكتە بالقاش قالاسىندا 15 جانە 16 جاستاعى ەكى ءجاسوسپىرىم قولعا ءتۇستى. تەرگەۋ دەرەكتەرىنە سايكەس، ولار 63 جالعان حابارلاما جىبەرگەن.
14 قازاندا قازاقستان ءىىم مەن رەسەي ءىىم-نىڭ بىرلەسكەن وپەراسياسى ناتيجەسىندە ساحا رەسپۋبليكاسىنىڭ اۋماعىندا استانا قالاسىنىڭ كامەلەتكە تولماعان تۇرعىنى ۇستالدى. ول رەسەيدىڭ ينتەرنەت كەڭىستىگىندە ۇلتتىق ارازدىق تۋدىراتىن ماتەريالدار جانە قازاقستان مەن رەسەيدە تەرروريزم تۋرالى جالعان حابارلامالار تاراتتى دەگەن كۇدىككە ىلىنگەن.
14 قاراشادا تارازدا مەكتەپتەر مەن ساۋدا ورتالىعىنا ءۇش جارىلعىش قۇرىلعى قويىلعانى تۋرالى جالعان اقپارات تاراتقان ءجاسوسپىرىم قولعا ءتۇستى.
15 قاراشادا اقتوبەدە ءۇش مەكتەپكە قاتىستى جالعان تەراكت حابارلامالارىن تاراتقان ءجاسوسپىرىم ۇستالدى.
20 قاراشادا استانادا WhatsApp ارقىلى وسىنداي ەكى جالعان حابارلاما جىبەرگەن تاعى ءبىر كامەلەتكە تولماعان ادام انىقتالدى.
بارلىق فاكتى بويىنشا قىلمىستىق ءىس قوزعالدى.
ءىىم وكىلدەرى swatting جانە جالعان توتەنشە جاعداي حابارلامالارى اۋىر قىلمىس بولىپ سانالاتىنىن ەسكە سالدى.
"Swatting جانە كەز كەلگەن جالعان حابارلامالار اۋىر قىلمىس رەتىندە قارالادى. ول ءۇشىن 5000 اەك-كە دەيىن ايىپپۇل نەمەسە بەس جىلعا دەيىن باس بوستاندىعىنان ايىرۋ جازاسى قاراستىرىلعان. اتا-انالاردى، مۇعالىمدەردى جانە جاستاردى جاۋاپكەرشىلىك تانىتىپ، كۇماندى ينتەرنەت-ترەندتەرگە ەرمەۋگە شاقىرامىز. مۇنداي "ازىلدەردىڭ" قوعامعا دا، جاسوسپىرىمدەردىڭ تاعدىرىنا دا ناقتى زيان كەلتىرەتىنىن ۇمىتپاۋ قاجەت"، – دەدى ق ر ءىىم كيبەرقىلمىسقا قارسى كۇرەس دەپارتامەنتى باسشىسىنىڭ ورىنباسارى اسلان وسكەمبايەۆ.
