قازاقستاندا سۇيىتىلعان مۇناي گازىن شەتەلگە اۆتوكولىك جانە تەمىرجول ارقىلى شىعارۋعا التى ايعا تىيىم سالىندى. ءتيىستى بۇيرىق ەنەرگەتيكا مينيسترلىگى تاراپىنان قابىلداندى، دەپ حابارلايدى Dalanews.kz.
قۇجاتقا سايكەس، تىيىم سۇيىتىلعان مۇناي گازىن، پروپاندى جانە بۋتاندى (تن ۆەد ەاەو كودتارى كورسەتىلگەن) ەكسپورتتاۋعا قولدانىلادى.
مينيسترلىكتىڭ مالىمەتىنشە، بۇل شەكتەۋ كەلەسى جاعدايلارعا جۇرمەيدى:
- ءونىمدى ءبولۋ تۋرالى كەلىسىم نەمەسە پرەزيدەنت بەكىتكەن جەر قويناۋىن پايدالانۋ كەلىسىمشارتى اياسىندا تۇراقتى سالىق رەجيمىمەن جۇمىس ىستەيتىن كومپانيالار؛
- قاراشىعاناق كەن ورنىندا وندىرىلگەن قازاقستاندىق شيكىزاتتان الىنعان تاۋارلاردى حالىقارالىق شارتتار نەگىزىندە ەكسپورتتاۋ؛
- قازاقستان اۋماعىن تەك ترانزيتپەن كەسىپ وتەتىن تاسىمالدار؛
- ۇكىمەت شەشىمىمەن گۋمانيتارلىق كومەك رەتىندە شىعارىلاتىن ونىمدەر.
بۇيرىق 2025 جىلعى 14 قاراشادان باستاپ كۇشىنە ەنەدى.
