قازاقستاندا ءسابىزدى شەتەلگە شىعارۋعا تىيىم ەنگىزۋ جوسپارلانباعان. بۇل تۋرالى پرەمەر-مينيستردىڭ ورىنباسارى، ۇلتتىق ەكونوميكا ءمينيسترى سەرىك جۇمانعارين مالىمدەدى، دەپ حابارلايدى Dalanews.kz.
ءمينيستردىڭ ايتۋىنشا، ەلدىڭ ىشكى نارىعى بۇل ونىممەن تولىق قامتاماسىز ەتىلگەن. 2025 جىلدىڭ قورىتىندىسى بويىنشا قازاقستاندا شامامەن 412 مىڭ توننا ءسابىز جينالىپ، جاڭا ءونىم الىنعانعا دەيىن جەتكىلىكتى قور قالىپتاستىرىلعان.
ۇكىمەتتە اتاپ وتكەندەي، قازىرگى جاعدايدا وتاندىق وندىرۋشىلەرگە ءونىمدى سىرتقى نارىقتارعا ەركىن ساتۋعا مۇمكىندىك بار، ال ەكسپورتقا شەكتەۋ قويۋعا نەگىز جوق.
وسىلايشا، بيلىك وكىلدەرى ءسابىز باعاسى مەن قولجەتىمدىلىگىنە قاتىستى ەشقانداي تاۋەكەل جوق ەكەنىن العا تارتىپ وتىر.
