قازاقستاندا ونەركاسىپتىك ماقساتتا قاراسورا ءوسىرۋ ەرەجەلەرى جاڭادان بەكىتىلدى. قاۋلىنىڭ نەگىزگى ماقساتى – وسىمدىكتى تەك وندىرىستىك باعىتتا پايدالانۋ جانە ونىڭ زاڭسىز اينالىمىنىڭ الدىن الۋ، دەپ حابارلايدى Dalanews.kz.
جاڭا تارتىپكە ساي قاراسورانىڭ تەك ارنايى رۇقسات ەتىلگەن سورتتارىن ەگۋگە بولادى. ول ءۇشىن مىندەتتى تۇردە ليسەنزيا قاجەت.
وسىرەتىن اۋماق ەلدىمەكەندەردەن، جولداردان جانە باسقا دا ەگىس القاپتارىنان كەمىندە ەكى شاقىرىم قاشىقتا ورنالاسۋعا ءتيىس. ۋچاسكە تولىقتاي تورلى نەمەسە تىكەنەك سىممەن قورشالىپ، تاۋلىك بويى كۇزەتىلەدى. كىرۋ-شىعۋ تەك ءبىر قاقپا ارقىلى جۇزەگە اسىرىلادى.
تۇقىم پايدالانباس بۇرىن زەرتحانالىق تەكسەرىستەن وتەدى. ونىڭ قۇرامىنداعى تەتراگيدروكاننابينول (تگك) كورسەتكىشى نورمادان اسپاعانى دالەلدەنۋى كەرەك. ەگەر ءوسىرۋ بارىسىندا تگك دەڭگەيى كوتەرىلسە، ول دەرەۋ جويىلادى.
مەملەكەت بۇل ارقىلى قاراسورانى ماتا، قاعاز، قۇرىلىس ماتەريالدارى سياقتى ونىمدەر وندىرىسىندە قولدانۋدى جۇيەلەمەك. سونىمەن قاتار، پسيحوبەلسەندى زاتتاردىڭ تارالۋىنا توسقاۋىل قويىپ، قاۋىپسىزدىك شارالارىن كۇشەيتۋدى كوزدەيدى.
