23 ساۋىردە استانا قالاسىندا «ۇلتتىق كىتاپ كۇنىن» مەرەكەلەۋ اياسىندا ءتول ادەبيەتىمىزدەگى 100 تانىمال كىتاپتى ىرىكتەپ الۋعا ارنالعان جالپىۇلتتىق ساۋالنامانىڭ تانىستىرىلىمى ۇيىمداستىرىلىپ، يگى ءىس-شارا باستالدى. ساۋالناما 3 ايعا سوزىلىپ، ناتيجەسى 10 تامىز – «اباي كۇنى» قارساڭىندا جاريالاناتىن بولادى،– دەپ حابارلايدى Dalanews.kz
ساۋالنامانىڭ باستى ماقساتى – ەلىمىزدىڭ ادەبي مۇراسىن ساقتاۋ جانە دامىتۋ، قازاقستان جازۋشىلارىنىڭ شىعارمالارىن دارىپتەۋ، حالىقتىڭ كىتاپ وقۋعا دەگەن قىزىعۋشىلىعىن ارتتىرۋ جانە باسپا ءىسىن دامىتۋ.
«مەملەكەت باسشىسى قاسىم-جومارت كەمەل ۇلى توقايەۆ بىلتىر ۇلتتىق قۇرىلتايدىڭ وتىرىسىندا «ۇلتتىق كىتاپ كۇنىن» بەلگىلەۋ يدەياسىن قولدادى. پرەزيدەنت: «وزىق ويلى ۇلت بولۋدىڭ ەڭ توتە جولى – كىتاپ وقۋ. سوندىقتان كىتاپ وقۋ مادەنيەتىن قوعامدا بارىنشا ورنىقتىرۋىمىز كەرەك»، – دەپ ايتقان ەدى. بۇگىن ءبىز العاش رەت «ۇلتتىق كىتاپ كۇنىن» اتاپ ءوتىپ وتىرمىز. وسىناۋ ايتۋلى كۇنى ءتول ادەبيەتىمىزدەگى 100 تاڭداۋلى كىتاپتى ايقىنداۋعا ارنالعان جالپىۇلتتىق ساۋالناما باستالدى. بۇل ءتىزىم كىتاپ وقۋعا دەگەن قىزىعۋشىلىقتى ارتتىرادى جانە ادەبيەتىمىزدى دامىتۋعا ىقپال ەتەدى دەپ ويلايمىن»، – دەدى ق ر مەملەكەتتىك كەڭەسشىسى ەرلان قارين.
ەلەكتروندى ۇكىمەتتىڭ رەسمي سايتىندا (eGov.kz) ارنايى ءبولىم اشىلىپ، وندا ءاربىر نيەت بىلدىرگەن ازامات قازاقستان جازۋشىلارىنىڭ ءوزى ۇناتاتىن شىعارمالارىنا داۋىس بەرە الادى.
ەلىمىزدىڭ قالالارىندا داۋىس بەرۋ پاراقشاسىنا وتۋگە مۇمكىندىك بەرەتىن QR-كود بەينەلەنگەن باننەرلەر ورناتىلادى. ساۋالناماعا قاتىسۋشىلار پروزا مەن پوەزيا، فانتاستيكا، پۋبليسيستيكا، تاريحي روماندار جانە باسقا دا ءتۇرلى جانرلار بويىنشا 10 كىتاپقا دەيىن تاڭداۋ جاساي الادى.
جۇرتشىلىقتىڭ قىزىعۋشىلىعىن ارتتىرۋ ءۇشىن جوبانىڭ سەرىكتەسى «مەلومان-MARWIN» دۇكەندەر جەلىسى ىنتالاندىرۋ سىيلىقتارىن ۇسىنادى.
«100 كىتاپ» جالپىۇلتتىق ساۋالناماسى كىتاپ وقۋ مادەنيەتىن نىعايتۋ جولىنداعى جاڭا قادام بولماق. سونداي-اق ۇلتتىڭ زياتكەرلىك الەۋەتىن ارتتىرۋعا جانە قازاق ادەبيەتىنىڭ ءرولىن كۇشەيتۋگە سەپتىگىن تيگىزەدى.
بۇل جوبا ۇلتتىق قۇرىلتايدىڭ باستاماسىمەن جۇزەگە اسىرىلىپ وتىر.
