23 sáýirde Astana qalasynda «Ulttyq kitap kúnin» merekeleý aiasynda tól ádebietimizdegi 100 tanymal kitapty iriktep alýǵa arnalǵan jalpyulttyq saýalnamanyń tanystyrylymy uiymdastyrylyp, igi is-shara bastaldy. Saýalnama 3 aiǵa sozylyp, nátijesi 10 tamyz – «Abai kúni» qarsańynda jariialanatyn bolady,– dep habarlaidy Dalanews.kz
Saýalnamanyń basty maqsaty – elimizdiń ádebi murasyn saqtaý jáne damytý, Qazaqstan jazýshylarynyń shyǵarmalaryn dáripteý, halyqtyń kitap oqýǵa degen qyzyǵýshylyǵyn arttyrý jáne baspa isin damytý.
«Memleket basshysy Qasym-Jomart Kemeluly Toqaev byltyr Ulttyq quryltaidyń otyrysynda «Ulttyq kitap kúnin» belgileý ideiasyn qoldady. Prezident: «Ozyq oily ult bolýdyń eń tóte joly – kitap oqý. Sondyqtan kitap oqý mádenietin qoǵamda barynsha ornyqtyrýymyz kerek», – dep aitqan edi. Búgin biz alǵash ret «Ulttyq kitap kúnin» atap ótip otyrmyz. Osynaý aitýly kúni tól ádebietimizdegi 100 tańdaýly kitapty aiqyndaýǵa arnalǵan jalpyulttyq saýalnama bastaldy. Bul tizim kitap oqýǵa degen qyzyǵýshylyqty arttyrady jáne ádebietimizdi damytýǵa yqpal etedi dep oilaimyn», – dedi QR Memlekettik keńesshisi Erlan Qarin.
Elektrondy úkimettiń resmi saitynda (eGov.kz) arnaiy bólim ashylyp, onda árbir niet bildirgen azamat Qazaqstan jazýshylarynyń ózi unatatyn shyǵarmalaryna daýys bere alady.
Elimizdiń qalalarynda daýys berý paraqshasyna ótýge múmkindik beretin QR-kod beinelengen bannerler ornatylady. Saýalnamaǵa qatysýshylar proza men poeziia, fantastika, pýblitsistika, tarihi romandar jáne basqa da túrli janrlar boiynsha 10 kitapqa deiin tańdaý jasai alady.
Jurtshylyqtyń qyzyǵýshylyǵyn arttyrý úshin jobanyń seriktesi «Meloman-MARWIN» dúkender jelisi yntalandyrý syilyqtaryn usynady.
«100 kitap» jalpyulttyq saýalnamasy kitap oqý mádenietin nyǵaitý jolyndaǵy jańa qadam bolmaq. Sondai-aq ulttyń ziiatkerlik áleýetin arttyrýǵa jáne qazaq ádebietiniń rólin kúsheitýge septigin tigizedi.
Bul joba Ulttyq quryltaidyń bastamasymen júzege asyrylyp otyr.
