ورتالىق ازيانىڭ ءۇش ەلىنىڭ ازاماتتارى قازاقستاندا ءۇش جىل ىشىندە 136 ملرد تەڭگە تابىس تاۋىپ، ءوز ەلىنە تريلليون تەڭگە اۋدارعان، دەپ حابارلايدى Dalanews.kz جوعارى اۋديتورلىق پالاتاعا سىلتەمە جاساپ. 

اۋديتورلاردا باقىلانبايتىن ەكونوميكانى ايقىنداۋ ادىستەمەلەرىنە قاتىستى دا سۇراقتار تۋىندادى. مىسالى، قولما-قول اقشاسىز اينالىم كوەففيسيەنتى قولدانىلادى. بۇل – جەكە تۇلعالاردىڭ تاۋارلار مەن كورسەتىلەتىن قىزمەتتەر ءۇشىن قولما-قول اقشاسىز تولەمدەرىنىڭ جىو-گە قاتىناسى. مۇنداي تولەمدەردىڭ ۇلەسى جىل سايىن ءوسىپ كەلەدى، بۇل كولەڭكەلى ەكونوميكا دەڭگەيىن اۆتوماتتى تۇردە «تومەندەتەدى». سوندىقتان بۇل كوەففيسيەنتتىڭ ورىندىلىعى كۇمان تۋدىرادى. 

سونداي-اق ەسەپتەۋ ساناتتارىنىڭ ءبىرى بويىنشا تۇرعىن ءۇيدى جالعا الۋ سالاسىن دا قامتيتىن «جىلجىمايتىن مۇلىكپەن جاسالاتىن وپەراسيالار» جانە «ونەر، ويىن-ساۋىق جانە دەمالىس» جىكتەۋىشتەرى ەسەپكە الىنبايدى. ال باسقا ساناتتا شاعىن ساۋدا كاسىپورىندارى جونىندەگى دەرەكتەر تۇتاس ەمەس، ىرىكتەمە ءادىس ارقىلى جينالا باستادى، بۇل باقىلانبايتىن ەكونوميكانى قامتۋدىڭ تومەندەۋىنە اكەلدى. 

جۇرگىزىلگەن تالداۋ نەگىزىندە مەملەكەتتىك اۋديت كولەڭكەلى اينالىمعا بەيىم تۇرعان تاۋەكەلى جوعارى ءبىرقاتار سالا مەن باعىتتى انىقتادى.

مىسالى، مەملەكەتتىك كىرىستەر كوميتەتىنىڭ دەرەكتەرى بويىنشا ورتالىق ازيانىڭ ءۇش ەلىنىڭ ازاماتتارى قازاقستاندا ءۇش جىل ىشىندە 136 ملرد تەڭگە تابىس تاپقان. الايدا ۇلتتىق بانكتىڭ اقپاراتى بويىنشا وسى ۋاقىت ىشىندە ولار ءوز ەلدەرىنە جالپى 1 ترلن تەڭگە اۋدارعان.

ياعني، «كولەڭكەلى» تاۋارلار نەمەسە كورسەتىلەتىن قىزمەتتەر بولۋ ىقتيمالدىعى جوعارى.