قازاقستاندا جەرگىلىكتى پوليسيا قىزمەتى تاراتىلدى، دەپ حابارلايدى Dalanews.kz.
مەملەكەت باسشىسى "قازاقستان رەسپۋبليكاسىنىڭ كەيبىر زاڭنامالىق اكتىلەرىنە قۇقىق قورعاۋ قىزمەتىن جەتىلدىرۋ، قۇقىق قورعاۋ ورگاندارىنىڭ، ارناۋلى مەملەكەتتىك ورگانداردىڭ، ازاماتتىق قورعاۋ ورگاندارىنىڭ قىزمەتكەرلەرىن جانە اسكەري قىزمەتشىلەردى تۇرعىن ۇيمەن قامتاماسىز ەتۋ جانە الەۋمەتتىك قورعاۋ، سونداي-اق ىشكى ىستەر ورگاندارىنىڭ قىزمەتى سالاسىندا ارتىق زاڭنامالىق رەگلامەنتتەۋدى بولعىزباۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى" قازاقستان رەسپۋبليكاسىنىڭ زاڭىنا قول قويدى.
بۇل زاڭ ارقىلى "قازاقستان رەسپۋبليكاسىنىڭ ىشكى ىستەر ورگاندارى تۋرالى"، "قۇقىق قورعاۋ قىزمەتى تۋرالى"، "تۇرعىن ءۇي قاتىناستارى تۋرالى"، "قۇقىقبۇزۋشىلىقتىڭ الدىن الۋ تۋرالى"، "داكتيلوسكوپيالىق جانە گەنومدىق تىركەۋ تۋرالى" جانە باسقا دا زاڭدارعا تۇزەتۋلەر ەنگىزىلدى.
- تۇزەتۋلەردىڭ ءبىرىنشى بلوگى قۇقىق قورعاۋ قىزمەتىن جەتىلدىرۋگە باعىتتالعان.
- تۇزەتۋلەردىڭ ەكىنشى بلوگى قۇقىق قورعاۋ، ارناۋلى مەملەكەتتىك ورگاندار، ازاماتتىق قورعاۋ ورگاندارى قىزمەتكەرلەرىنىڭ جانە اسكەري قىزمەتشىلەردىڭ الەۋمەتتىك قورعالۋ دەڭگەيىن ارتتىرۋدى كوزدەيدى.
- تۇزەتۋلەردىڭ ءۇشىنشى بلوگى ىشكى ىستەر ورگاندارىنىڭ قىزمەتىن جەتىلدىرۋگە قاتىستى. ماسەلەن "مەملەكەتتىك اپپاراتتىڭ قىزمەتىن بيۋروكراتيادان ارىلتۋ جونىندەگى شارالار تۋرالى" جارلىقتى ىسكە اسىرۋ ءۇشىن ىشكى ىستەر ورگاندارىنىڭ قىزمەتى سالاسىنداعى زاڭنامانىڭ ماقساتتارى، مىندەتتەرى مەن قاعيداتتارى، سونداي-اق، ۋاكىلەتتى مەملەكەتتىك ورگانداردىڭ قۇزىرەتى ناقتىلاندى. پوليسيا قىزمەتىن ۇيىمداستىرۋ ءىسىن جەتىلدىرۋ ماقساتىندا جەرگىلىكتى پوليسيا قىزمەتى تاراتىلدى.
- تۇزەتۋلەردىڭ ءتورتىنشى بلوگى سورانى ونەركاسىپتە پايدالانۋ، سونداي-اق، قۇقىقبۇزۋشىلىقتىڭ الدىن الۋ شارالارىن قاراستىرادى.
- زاڭعا سايكەس ۇكىمەتكە ەسىرتكى وندىرۋگە نەمەسە دايىنداۋعا قاتىسى جوق، ونەركاسىپتىك ماقساتتا وسىرۋگە رۇقسات ەتىلگەن سورا سۇرىپتارىن انىقتاۋ قۇزىرەتى بەرىلدى جانە سورانى ونەركاسىپتىك وڭدەۋ ءتارتىبى ايقىندالدى.
