قازاقستاندا جاسىرىن باقىلاۋعا ارنالعان قۇرىلعىلاردى ساتۋعا مىندەتتى سەرتيفيكاتتاۋ مەن ليسەنزيالاۋ ەنگىزۋ ۇسىنىلدى. بۇل باستامانى ءماجىلىس دەپۋتاتى ءابۋتالىپ ءمۇتالى كوتەرىپ، شاعىن-كامەرالار، ديكتوفوندار، GPS-ترەكەرلەر مەن GSM-ماياكتار نارىعى ءىس جۇزىندە جەتكىلىكتى دەڭگەيدە رەتتەلمەي وتىرعانىن اتاپ ءوتتى، دەپ حابارلايدى Dalanews.kz.
دەپۋتاتتىڭ ايتۋىنشا، مۇنداي قۇرىلعىلار زاڭسىز باقىلاۋ جۇرگىزۋ ءۇشىن پايدالانىلىپ، ازاماتتاردىڭ جەكە ومىرىنە قول سۇعۋعا اكەلۋى مۇمكىن. سونىمەن قاتار ولار جەكە دەرەكتەردى زاڭسىز جيناۋ، بوپسالاۋ جانە قۋدالاۋ تاۋەكەلدەرىن ارتتىرادى.
ءمۇتالى قازىرگى زامانعى اۆتوكولىكتەرگە دە ەرەكشە الاڭداۋشىلىق ءبىلدىردى. ونىڭ سوزىنشە، شەتەلدىك سەرۆەرلەرگە قوسىلعان جۇيەلەر پايدالانۋشىلاردىڭ قوزعالىسى مەن بەلسەندىلىگىن باقىلاۋعا مۇمكىندىك بەرۋى ىقتيمال، بۇل دەرەكتەر قاۋىپسىزدىگىنە قاتىستى قوسىمشا ءقاۋىپ تۋدىرادى.
ماسەلەنى شەشۋ ءۇشىن دەپۋتات جاسىرىن باقىلاۋ قۇرىلعىلارىنىڭ اينالىمىنا مەملەكەتتىك باقىلاۋدى كۇشەيتۋدى، ءتيىستى مەملەكەتتىك ورگانداردى تارتۋدى جانە قولدانىستاعى زاڭناما اياسىندا ازاماتتاردىڭ جەكە دەرەكتەرىن قورعاۋدى قامتاماسىز ەتۋدى ۇسىندى.
