قازاقستاندا "جاساندى ينتەللەكت الىپپەسى" كىتابىنىڭ تۇساۋكەسەرى ءوتتى. ەڭبەك — قارقىندى دامىپ كەلە جاتقان جاڭا سالا تۋرالى العاش رەت قازاق تىلىندە جازىلعان ءتۇپنۇسقا بولۋىمەن ەرەكشەلەنەدى. ءىس-شارا بارىسىندا TurkAI – تۇركى مەملەكەتتەرىنىڭ جاساندى ينتەللەكتشىلەر قاۋىمداستىعىنىڭ قۇرىلعانى حابارلاندى. سونداي-اق سالالىق "AI-hub" كومپانياسى مەن ai-hub.kz سايتى تانىستىرىلدى، - دەپ حابارلايدى Dalanews.kz
الماتىدا وتكەن كىتاپتىڭ تانىستىرىلىمىنا حالىقارالىق ساراپشىلار عالىمدار، زيالى قاۋىم، قوعام قايراتكەرلەرى، مەديا، ءبىلىم جانە تەحنولوگيا سالاسىنىڭ بەلگىلى تۇلعالارى مەن ماماندارى قاتىستى.
"ساراپشىلاردىڭ ايتۋىنشا، جاساندى ينتەللەكت تەحنولوگياسىنىڭ تيىمدىلىگى جىل وتكەن سايىن ارتا تۇسپەك. سوندىقتان الدىمىزدا اۋقىمدى مىندەتتەر تۇر. قازاقستان ەۋرازياداعى اسا ءىرى سيفرلىق حابقا اينالۋعا ءتيىس. سيفرلىق دامۋ ماسەلەسىنە تىڭ، جاڭاشا كوزقاراسپەن قاراۋ قاجەت"، - دەدى پرەزيدەنت قاسىم-جومارت توقايەۆ.
جالپى باستاماشى توپتىڭ ايتۋىنشا، ەلىمىزدىڭ دە اتالعان سالا كوشىنەن قالماۋى ءۇشىن ەكى جىل بۇرىن قازاق ءتىلدى اۋديتورياعا ارناپ ارنايى ەڭبەك جازۋعا كىرىسكەن.
"ەڭبەك – باعدارلامالاۋدى بىلمەيتىن، ءبىراق AI مۇمكىندىكتەرىن زەرتتەپ، قولدانعىسى كەلەتىن ادامدارعا ارنالعان. جاساندى ينتەللەكت سالاسىنداعى نەگىزگى ۇعىمداردى قاراپايىم تىلمەن تۇسىندىرەدى. ءقازىردىڭ وزىندە سۇرانىس وتە جوعارى بولعاندىقتان، كىتاپتى ەكىنشى باسىلىمعا جىبەرىپ جاتىرمىز"،- دەدى كىتاپ اۆتورى مەيىرجان اۋەلحان ۇلى.
بەلگىلى جۋرناليست، قالامگەر، پۋبليسيست ءارى ەڭبەكتىڭ رەداكتورى قاينار ولجاي جاساندى ينتەللەكت دەگەن نە دەگەن ساۋالعا تولىق جاۋاپ بەرەتىن كىتاپتىڭ وتە ساۋاتتى جازىلعانىن، قازاق وقىرمانىنا اۋاداي قاجەت ەكەنىن اتاپ ءوتتى.
"ال جاساندى ينتەللەكتى قالاي جۇمساۋ كەرەك" دەگەندەر ءۇشىن تولىق تاجىريبەلىك كۋرس قامتىلعان. وي ىسىندەگى قولعاناتقا سان سالادا بەرىلەتىن تاپسىرما (ونى "پرومپت" دەيدى ەكەن) تولىق تىزىلگەن. شەكەسىنەن شەرتىپ الىپ قولدانا بەرەسىز"،-دەدى ول.
قازاق ۇلتتىق قىزدار پەداگوگيكالىق ۋنيۆەرسيتەتىنىڭ باسقارما ءتوراعاسى – رەكتورى، كەمبريدج ۋنيۆەرسيتەتىنىڭ تۇلەگى گۇلميرا قانايدا ءوز پىكىرىن ايتتى.
"ءبىلىم بەرۋ سالاسىندا وزگەرىستەردى جاسايتىن بىردەن-بىر فاكتور تەحنولوگيا. اتالعان كىتاپ، وتاندىق عىلىم مەن ءبىلىم سالاسىنىڭ جاڭا وزگەرىستەرگە بەيىمدەلۋىندە ماڭىزدى قادام دەپ سانايمىن"،- دەدى رەكتور.
سونداي-اق بەلگىلى مەديا مەنەدجەر، قازاقستاننىڭ ەڭبەك سىڭىرگەن قايراتكەرى نۇرجان جالاۋ قىزى، بەلگىلى ادەبيەتتانۋشى عالىم ماماي اقەتوۆ، ءال-فارابي اتىنداعى قازاق ۇلتتىق ۋنيۆەرسيتەتىنىڭ جۋرناليستيكا فاكۋلتەتى دەكانى قانات اۋەسباي وزگە دە قاتىسۋشىلار ءوز لەبىزدەرىن ءبىلدىردى.
"وسى كىتاپتى وقۋ-اعارتۋ مينيسترلىگىنىڭ ساراپشىلارى قاراپ شىعىپ، قوسار-الار تۇستارى بولسا، اۆتورمەن جۇمىس ىستەپ، مەكتەپتەرگە تاراتۋ كەرەك. جاساندى ينتەللەكت داۋىرىندە ونى دۇرىس قولدانۋ، پرومپتاردى دۇرىس جازۋ ءادىسى ماڭىزدى دەپ ويلايمىن"،- دەدى كىتاپ تۋرالى بەلگىلى پەداگوگ ومىربەك شىنىبەك ۇلى.
كىتاپ ورتالىق ازيا ەلدەرىندە جاساندى ينتەلەكت سالاسىنا قاتىستى العاش شىققاندىقتان وزبەكستان، قىرعىزستان ەلدەرىنەن اۋدارۋعا ۇسىنىستار تۇسكەن.
مەملەكەتتىك سىيلىقتىڭ يەگەرى، تۇركى دۇنيەسى جازۋشىلار وداعىنىڭ ءتوراعاسى ۇلىقبەك ەسداۋلەت الەمدە ءقازىر ەڭ ماڭىزدى سالاعا اينالعان جاساندى ينتتەلەكت بويىنشا دا باۋىرلاس ەلدەردىڭ دە الاتىن ءوز ەنشىسى بار ەكەنىن ايتتى.
ءىس-شارا اياسىندا جاڭا قۇرىلعان «AI-HUB» كومپانياسىنىڭ ماقساتى ايتىلدى. ونىڭ باسشىسى ەرجانار اشەيحاننىڭ سوزىنشە، كومپانيا – جاساندى ينتەللەكت، IT، كيبەر جانە اقپاراتتىق قاۋىپسىزدىك، اقپاراتتىق جانە سيفرلىق تەحنولوگيالار، سونداي-اق بيوتەحنولوگيالاردى زەرتتەۋ مەن دامىتۋعا باعىتتالعان بىرەگەي ۇيىمعا اينالۋدى كوزدەيدى. نەگىزگى ماقساتى – وزىق تەحنولوگيالاردى ءتۇرلى سالالارعا ەنگىزۋ، حالىقتىڭ سيفرلىق جانە اقپاراتتىق ساۋاتىن ارتتىرۋ، سونداي-اق سالالىق ستارتاپتاردى قولداۋ.
جاساندى ينتەللەكتكە قاتىستى العاش رەت وقۋلىق باسىپ شىعارعان Ai-Hub publishing باسپاسى بولسا، الداعى ۋاقىتتا جاراتىلىستانۋ، IT مەن جاساندى ينتەللەكت سالاسىنا قاتىستى الەمدەگى تانىمال كىتاپتاردى قازاقشا اۋدارماق. سونىمەن قاتار، سالا عالىمدارى، ماماندارىمەن بىرلەسە وتىرىپ بالالارعا، وقۋشىلار مەن ستۋدەنتتەرگە ارنالعان وقۋلىقتار مەن ادىستەمەلەر ازىرلەۋدى كوزدەپ وتىر. سونداي-اق جاساندى ينتەللەكت تەرميندەرىن جاساۋ مەن ەنسيكلوپەدياسىن قازىردەن باستاپ دايىنداۋدى قولعا الماق.
سونداي-اق «AI-HUB» كومپانياسىنىڭ نەگىزىن قالاۋشىلاردىڭ ءبىرى نۇربولات نىشانبايەۆ تۇركى مەملەكەتتەرى جاساندى ينتەللەكت سالاسى وكىلدەرىنىڭ باسىن قوساتىن TurkAI قاۋىمداستىعى قۇرىلىپ، باۋىرلاس ەلدەرمەن بىرلەسكەن جۇمىستار كۇشەيتىلەتىنى حابارلاندى. جيىنعا تۇركى ەلدەرىنەن جانە ەۋروپادان جاساندى ينتەلەكت سالاسىندا جۇمىس ىستەيتىن كومپانيا باسشىلارى ونلاين قاتىسىپ، ءوز پىكىرلەرىن ءبىلدىردى.
تۇركيانىڭ Robotzade تەحنولوگيالىق كومپانياسى ديرەكتورى مەرت دوعان تۇركى مەملەكەتتەرىنىڭ جاساندى ينتەللەكت اسسوسياسياسىنىڭ قازاقستاندا قۇرىلۋىنىڭ ءوزى ماڭىزدى وقيعا دەپ اتاپ ءوتتى.
"تۇركى حالىقتارى اراسىنداعى بايلانىس تەك، ساياسات پەن ەكونوميكادا عانا ەمەس، سونىمەن قاتار ءبىلىم، عىلىم جانە تەحنولوگيا سالالارىندا دا وتە مىعىم بولۋى قاجەت دەپ سانايمىن. قازاق تىلىندە تۇڭعىش جاريالانىپ وتىرعان، "جاساندى ينتەللەكت الىپپەسى" ەڭبەگىمەن قۇتتىقتايمىن. بۇل كىتاپ، تۇتاس تۇركى دۇنيەسى ءۇشىن وتە زور ماڭىزعا يە"،- دەدى ول.
ال ءوز كەزەگىندە بىرىككەن اراب امىرلىگىنىڭ AI Global كومپانياسى وكىلى اممارا افتاب كومپانياعا ساتتىلىك تىلەدى.
"جاساندى ينتەللەكتى سالاسىندا العاشقى قازاق تىلىندەگى كىتاپتىڭ جاريالانۋى تۇتاس ايماق ءۇشىن وتە ماڭىزدى قادام. قازاقستاندا، قۇرىلىپ، تۇتاس اۋماقتى قامتۋدى ماقسات ەتىپ وتىرعان اI-Hub كومپانياسىنا ساتتىلىك تىلەيمىن!"، - دەدى اممارا افتاب.
شوتلانديانىڭ AI-Tech solution LTD كومپانياسىنىڭ باس ديرەكتورى روبەرت سيم دە ءوز ويىن ايتتى.
"سوڭعى جىلدارى، جاساندى ينتەللەكتى بۇكىل الەم بويىنشا ءومىردىڭ بارلىق سالالارىنا كىرۋدە. بىزگە بىرلەسىپ كوپتەگەن جەتىستىكتەرگە جەتۋگە بولادى. الداعى ۋاقىتتا قازاقستاننىڭ AI-Hub كومپانياسىمەن ورتاق جوبالارىمىزدى جۇزەگە اسىراتىمىزعا سەنىمىم مول"،-دەدى روبەرت سيم.
ۇيىمداستىرۋشىلار الداعى ۋاقىتتا كىتاپتىڭ تۇساۋكەسەرى استانا قالاسى مەن بارلىق وبلىس ورتالىقتارىندا وتەتىنىن حابارلادى.
