الاياقتىق بويىنشا اسا ءىرى مولشەردە كۇدىككە ىلىنگەن تۇلعا گرەكيادان ەكستراديسيالاندى، دەپ حابارلايدى Dalanews.kz.
بۇگىن قازاقستان رەسپۋبليكاسى باس پروكۋراتۋراسى مەن ىشكى ىستەر مينيسترلىگىنىڭ ينتەرپول قىزمەتكەرلەرى گرەكياداعى قازاقستان ەلشىلىگىنىڭ جاردەمىمەن اتالعان ەلدەن اسا ءىرى مولشەردە الاياقتىق جاسادى دەگەن كۇدىكپەن قازاقستان رەسپۋبليكاسىنىڭ ازاماتشاسىن ەكستراديسيالادى.
ول 2021 جىلى، الماتى قالاسىنداعى تاسىمالداۋ كومپانياسىندا بۋحگالتەر بولىپ جۇمىس ىستەي وتىرىپ، ءوزىنىڭ باسشىسىنان 230 000 اقش دوللارىن بانكتىك سەيف ۇياشىعىندا ساقتاۋ سىلتاۋىمەن الىپ، ولاردى يەمدەنىپ كەتكەن دەگەن كۇدىككە ىلىنگەن.
قىلمىس جاساعاننان كەيىن ول جاسىرىنىپ، وسىعان بايلانىستى حالىقارالىق ىزدەۋگە جاريالانعان.
2024 جىلعى ماۋسىمدا ول گرەكيا اۋماعىندا ۇستالىپ، قازاقستان رەسپۋبليكاسى باس پروكۋراتۋراسىنىڭ سۇراۋى بويىنشا وتانىنا ەكستراديسيالاندى.
قازاقستان مەن گرەكيا اراسىندا تىكەلەي اۋە قاتىناسىنىڭ بولماۋىنا بايلانىستى ونى سەربيا اۋماعى ارقىلى ترانزيتتىك تاسىمالداۋدى ۇيىمداستىرۋعا قازاقستاننىڭ سەربيا رەسپۋبليكاسىنداعى ەلشىلىگى قولعابىس كورسەتتى.
قازىرگى ۋاقىتتا كۇدىكتى استانا قالاسىنىڭ تەرگەۋ يزولياتورىنا قاماۋعا الىندى.
وعان تاعىلىپ وتىرعان قىلمىس ءۇشىن مۇلكى تاركىلەنىپ، بەلگىلى ءبىر لاۋازىمداردى اتقارۋ نەمەسە بەلگىلى ءبىر قىزمەتپەن اينالىسۋ قۇقىعىنان ون جىلعا دەيىنگى مەرزىمگە ايىرا وتىرىپ، ون جىلعا دەيىنگى مەرزىمگە باس بوستاندىعىنان ايىرۋ جازاسى كوزدەلگەن.
