ەسەپتى كەزدەسۋدە بيىل مينيسترلىك كەزەڭ-كەزەڭىمەن سيفرلىق تەلەراديو حابار تاراتۋدى قوسا باستايتىنىن ايتىلدى. 2018 جىلدىڭ اياعىنا دەيىن ماڭعىستاۋ، جامبىل جانە وڭتۇستىك قازاقستان وبلىستارى تولىق سيفرلىق حابار تاراتۋعا كوشەدى دەپ كۇتىلۋدە. ال وزگە ايماقتاردى سيفرلىق حابار تاراتۋمەن قامتاماسىز ەتۋ 2020 جىلدىڭ اياعىنا دەيىن اياقتالماق.
سونداي-اق، «اقپاراتقا قولجەتىمدىلىك» زاڭىن جۇزەگە اسىرۋ اياسىندا «اشىق ۇكىمەت» جوباسى جۇزەگە اسىرىلۋدا. وسى ارقىلى كەز كەلگەن ازامات مەملەكەتتىك ورگانداردىڭ ءبىرىنشى جەتەكشىلەرىنە بلوگ-پلاتفورمالار ارقىلى سۇراقتارىن قويىپ، «اشىق ديالوگ» پورتالىندا ينتەرنەت-كونفەرەنسيالارعا قاتىسا الادى. بۇل قۇرال حالىق پەن مەملەكەت اراسىنداعى قارىم-قاتىناستى نىعايتۋعا باعىتتالعان.
وتكەن جىلى قابىلدانعان «سيفرلىق قازاقستان» مەملەكەتتىك باعدارلاماسىنىڭ باعىتتارىنىڭ ءبىرى ەلدەگى ينتەرنەت-ينفراقۇرىلىمىن دامىتۋ بولىپ تابىلادى.
قازىرگى ۋاقىتتا ەلىمىزدەگى 13 ميلليوننان استام ادام جوعارى جىلدامدىقتاعى ينتەرنەتكە قول جەتكىزدى. حالىق سانى 10 مىڭ ادامنان تۇراتىن ەلدىمەكەندەر 3G بايلانىسىمەن قامتىلسا، حالقى 50 مىڭنان اساتىن قالالار 4G ستاندارتىمەن قامتىلعان. وتكەن جىلى ەلىمىزدىڭ بارلىق اۋدان ورتالىقتارى ينتەرنەت جەلىسىنىڭ ءتورتىنشى بۋىنىمەن قامتىلعانىن ايتا كەتۋىمىز كەرەك.
مينيسترلىكتىڭ بۇدان كەيىنگى مىندەتى كەڭجولاقتى ينتەرنەتتى اۋىلدىق ەلدى مەكەندەرگە جەتكىزۋگە كۇش سالۋدا. ول ءۇشىن مەملەكەتتىك-جەكەمەنشىك ارىپتەستىك جوباسىنا سايكەس ءتيىستى جۇمىس جۇزەگە اسۋدا. جوبا اياسىندا 2021 جىلعا دەيىن جوعارى جىلدامدىقتاعى ينتەرنەتپەن جالپى سانى 2 ميلليوننان استام تۇرعىنى بار 1249 اۋىلدىق ەلدى مەكەن قامتىلاتىن بولادى.
باعدارلاما اياسىندا ىسكە قوسىلعان جوبالاردىڭ ىشىندە داۋرەن ابايەۆ «ەلەكتروندىق ەڭبەك بيرجاسى» جانە ەلەكتروندى كوممەرسيانى دامىتۋ ءۇشىن قۇقىقتىق جاعداي جاسالعانى تۋرالى ايتتى.
حالىققا ەلەكتروندى مەملەكەتتىك قىزمەت كورسەتۋ سالاسىندا اقپارات جانە بايلانىس مينيسترلىگى جۇيەلى جۇمىس اتقارۋدا.
سونىمەن، بۇگىنگى كۇنى «ەلەكتروندى ۇكىمەت» پورتالى 235 قىزمەتتى الۋعا مۇمكىندىك بەرەدى، e-License.kz ەلەكتروندىق ليسەنزيالاۋ پورتالى – 399 اۆتوماتتاندىرىلعان قىزمەت ءتۇرىن كورسەتەدى.
2017 جىلى «ەلەكتروندى ۇكىمەت» پورتالى ارقىلى 34 ميلليوننان استام قىزمەت كورسەتىلدى، «ە-ليسەنزيالاۋ» اقپاراتتىق جۇيەسى ارقىلى 1 ميلليونعا جۋىق ليسەنزيالار مەن رۇقساتتار بەرىلدى. E-gov.kz پورتالى ارقىلى 2012 جىلدان باستاپ 135 مىڭنان استام كومپانيا اشىلدى.
بۇگىنگى تاڭدا «ازاماتتارعا ارنالعان ۇكىمەت» مەملەكەتتىك كورپوراسياسى بارلىق مەملەكەتتىك قىزمەتتەردىڭ 83% -ىن (621 قىزمەت) كورسەتەدى. وتكەن جىلى ول 38 ميلليون قىزمەت كورسەتتى، اعىمداعى جىلدىڭ باسىنان بەرى 10 ميلليوننان استام قىزمەت كورسەتىلدى.
اقپارات جانە كوممۋنيكاسيالار مينيسترلىگى
باسپا ءسوز قىزمەتى
