ءماجىلىس ۇقشۇ كۇشتەرىن قولدانۋدىڭ قۇقىقتىق نەگىزدەرىن كەڭەيتۋ جانە ۇيىم تەتىكتەرىن جاڭعىرتۋعا باعىتتالعان ەكى زاڭ جوباسىمەن جۇمىس ىستەپ جاتىر، دەپ حابارلايدى Dalanews.kz.
قانداي وزگەرىستەر جوسپارلانىپ وتىر:
ۇقشۇ اسكەرىن ەنگىزۋ نەگىزدەرىن كەڭەيتۋ. بۇدان بىلاي بۇل تەك قارۋلى شابۋىل كەزىندە عانا ەمەس، سونىمەن قاتار داعدارىستىق جاعدايلاردىڭ الدىن الۋ، توتەنشە جاعدايلاردىڭ سالدارىن جويۋ جانە گۋمانيتارلىق كومەك كورسەتۋ ءۇشىن دە مۇمكىن بولادى.
ۇقشۇ ەلدەرىندە ۋاقىتشا اسكەري قۇرامالار مەن ءتيىستى قولباسشىلىق قۇرۋ. بۇل قاۋىپ-قاتەرلەرگە جەدەل ارەكەت ەتۋگە مۇمكىندىك بەرەدى.
ءترانزيتتى جەڭىلدەتۋ. ۇقشۇ ەلدەرىنىڭ اۋماقتارى ارقىلى جەكە قۇرام مەن اسكەري ماقساتتاعى ونىمدەردى جەدەل تاسىمالداۋ ءۇشىن راسىمدەر وڭايلاتىلماق.
بيولوگيالىق قاۋىپسىزدىك سالاسىنداعى ءوزارا ءىس-قيمىلدى كەڭەيتۋ.
بۇل باستاما ۇقشۇ كۇشتەرىنىڭ ۇيىمعا مۇشە مەملەكەتتەردىڭ اۋماعىندا ۋاقىتشا بولۋىن قۇقىقتىق تۇرعىدان جەتىلدىرۋگە باعىتتالعان.
ساراپشىلار بۇل قادامداردى تەرروريزم، ەكسترەميزم جانە اقپاراتتىق كەڭىستىكتەگى دەسترۋكتيۆتى ارەكەتتەردى قوسا العاندا، زاماناۋي قاۋىپ-قاتەرلەرگە يكەمدىرەك جاۋاپ بەرۋ قاجەتتىلىگىمەن بايلانىستىرىپ وتىر.
ەسكە سالايىق، 2026 جىلى ۇقشۇ-عا رەسەي ءتوراعالىق ەتەدى، ال ۇيىمنىڭ باس حاتشىسى قىزمەتىنە قىرعىزستان وكىلى تاالاتبەك ماسادىكوۆ تاعايىندالعان.
