«ەرجٷرەك ەسٸمدەر» اتتى بەينەروليكتەر تسيكلى 1941-1945 جىلدارداعى ۇلى وتان سوعىسىندا ەرلٸك كٶرسەتكەن 80 قازاقستاندىق باتىر تۋرالى باياندايدى. روليكتەردە ەربٸر كەيٸپكەردٸڭ ٶمٸر جولى مەن جاۋىنگەرلٸك ەرلٸگٸ, جەڭٸسكە قوسقان ٷلەسٸ كٶرسەتٸلەدٸ, – دەپ حابارلايدى Dalanews.kz.
بەينەروليكتەر توپتاماسى «Qazaqstan» تەلەارناسى مەن «قازاقستان» تەلەراديوكورپوراتسيياسىنا قاراستى 14 ايماقتىق تەلەارنالاردىڭ ەفيرٸنەن 27 ناۋرىزدان باستاپ, 9 مامىر – جەڭٸس كٷنٸنە دەيٸن كٶرسەتٸلەدٸ.
جوبانىڭ ماقساتى - سوعىسقا قاتىسقان قازاقستاندىق باتىرلار تۋرالى اقپاراتتاردى جٷيەلەي وتىرىپ, ولاردىڭ تاريحي ەرلٸگٸنە قۇرمەت قالىپتاستىرۋ. بەينەروليكتەر كٶرەرمەندەردٸڭ قازاقستاننىڭ جەڭٸسكە قوسقان ٷلەسٸ تۋرالى بٸلٸمٸن كەڭەيتۋگە, جاستاردى وتانسٷيگٸشتٸككە تەربيەلەپ, تاريحقا قىزىعۋشىلىعىن ارتتىرۋعا مٷمكٸندٸك بەرەدٸ.
«ەرجٷرەك ەسٸمدەر» جوباسىن جاساۋدا رەسپۋبليكا بويىنشا ەر ٶڭٸردٸڭ ارداگەرلەر كەڭەسٸ ۇيىمىنان, باتىرلاردىڭ ۇرپاقتارىنان اۆتوبيوگرافيياسى مەن ەستەلٸكتەر جيناقتالدى. سونداي-اق, «ۇمىتىلعان قاھارماندار» (2019 ج.), «گەروي ۆەليكوي پوبەدى – كازاحستانتسى» (ٸ توم, 2016 ج.), «گەروي ۆەليكوي پوبەدى – كازاحستانتسى» (ٸٸ توم, 2016 ج.), «سايىپقىران ساربازدار» (2022 ج.) كٸتاپتارىنان اقپارات الىندى.
