گۋريەۆتٸڭ ايتۋىنشا رەسەي ەكونوميكاسى سوڭعى بٸرنەشە جىل بويى بٸر ورنىندا تۇرالاپ تۇر. 90-شى توقىراۋ جىلدارىنداعى داعدارىستىڭ اۋىلى دا الىس ەمەس.
"رەسەي ەكونوميكاسى جىلىنا 1,5-2 پايىزدىق قارقىنمەن ٶسەدٸ دەگەن بولجامنىڭ ورىندالمايتىن تٷرٸ بار. كوروناۆيرۋس كرەملدٸڭ جوسپارىن كٷل-تالقان ەتتٸ. داعدارىس رەسەي ەكونوميكاسىنىڭ ەڭسەسٸن كٶتەرتپەيدٸ, كەرٸسٸنشە كٷيزەلٸسكە ۇشىراتا تٷسەدٸ", – دەيدٸ گۋريەۆ.
ساراپشىنىڭ پايىمداۋىنشا رەسەي رەفورما جٷرگٸزۋدەن بٸرجولاتا باس تارتقان. ەزٸرگٸ داعدارىستىڭ سەبەبٸ سوندا.
"رەسەي ەكونوميكاسىنىڭ بٷگٸنگٸ كەيپٸ 70-80-شٸ جىلداعى كەڭەس وداعىنىڭ سۇرقى كەتكەن جٷيەسٸنە ۇقساس. رەفورما اتىمەن جوق. ٶسٸم بولادى-اۋ دەگەن ٷمٸت مٷلدەم ٶشكەن. جاعداي شىنىمەن دە ۇشىعىپ تۇر. رەسەي كٷن ٶتكەن سايىن ٶركەنيەتتٸ ەلەمنەن قول ٷزٸپ, كٶش سوڭىندا سٷيرەتٸلٸپ كەلەدٸ.
سوڭعى جىلدارى قازاقستان رەسەيدٸ قۋىپ جەتٸپ, ول ازداي باسىپ وزدى. بٸر كەزدەرٸ پوستكەڭەستٸك كەڭٸستٸكتٸ اشسا الاقانىندا, جۇمسا جۇدىرىعىندا ۇستاعان دەۋلەتتٸ ەلدٸڭ قازٸر "قۋ سٷيەگٸ" عانا قالعان. وسىدان 20 جىل بۇرىن رەسەيدەن 40 پايىزعا قالىپ كەلە جاتقان قازاقستان رەسەيدٸ قۋىپ جەتتٸ", – دەيدٸ ەكونوميست.
Bloomberg -تٸڭ بولجاۋىنشا رەسەيدٸڭ جالپى ٸشكٸ ٶنٸمٸ بيىلدىققا 16 پايىزعا قۇلدىراپ, توقىراۋ جىلدارىنىڭ كٶرسەتكٸشٸن قايتالايدى.
