قازاقستان سىرتقى ىستەر مينيسترلىگى (ءسىم) رەسەي سىرتقى ىستەر ءمينيسترى سەرگەي لاۆروۆتىڭ "قازاقستاننىڭ اقش ازاماتتارىنا ەلگە ۆيزاسىز كەلۋىنە رۇقسات بەرۋى ماسەلەسىن تالقىلاۋ كەرەك" دەگەن مالىمدەمەسىنە جاۋاپ قايىردى.
قازاقستاندىق اقپارات اگەنتتىكتەرىنىڭ حابارلاۋىنشا، ءسىم رەسمي وكىلى ءانۋار جايناقوۆ قازاقستاننىڭ وزگە ەل ازاماتتارىنا ۆيزاسىز رەجيم ورناتۋعا "ەرىكتى ەكەنىن" ايتقان.
"ەۋرازيا ەكونوميكالىق وداعى ساياسي بىرلەستىك ەمەس. وداق تۋرالى كەلىسىمدى جاساۋدا مۇشە ەلدەر ونى ساياسيلاندىرۋدان جانە وداق قۇزىرىنا ۇلتتىق ەگەمەندىككە قاتىستى ماسەلەلەردى قوسۋدان باس تارتقان" دەدى جايناقوۆ.
رەسەيلىك باق-تىڭ حابارلاۋىنشا، سەرگەي لاۆروۆ بۇعان دەيىن "رەسەي - مۇمكىندىكتەر ەلى" دەپ اتالاتىن فورۋمدا قازاقستاننىڭ اقش ازاماتتارىنا ۆيزاسىز ەلگە كەلۋىنە رۇقسات بەرۋ جايىن "ەۋرازيا ەكونوميكالىق وداعى (ەاەو) اياسىندا كەلىسۋ قاجەتىن" مالىمدەگەن.
لاۆروۆتىڭ سوزىنشە، ەاەو-دا ۆيزاسىز ءجۇرىپ-تۇرۋ ەرەجەسى بار.
دەرەككوز: ازاتتىق
