ماسكەۋدە قازاقستان رەسپۋبليكاسى مەن رەسەي فەدەراسياسى اراسىنداعى مادەني-گۋمانيتارلىق ىنتىماقتاستىق جونىندەگى كىشى كوميسسيانىڭ ءتورتىنشى وتىرىسى ءوتتى، دەپ حابارلايدى Dalanews.kz
ءىس-شاراعا ەكى ەلدىڭ مادەنيەت مينيسترلەرى – ق ر مادەنيەت جانە اقپارات ءمينيسترى ايدا بالايەۆا مەن رف مادەنيەت ءمينيسترى ولگا ليۋبيموۆا ءتوراعالىق ەتتى. سونداي-اق جيىنعا ەكى ەل دەلەگاسيالارى قاتىستى.
كەزدەسۋ بارىسىندا ايدا بالايەۆا ەلدەر اراسىنداعى مادەني-گۋمانيتارلىق ىنتىماقتاستىقتىڭ جاڭا دەڭگەيگە كوتەرىلگەنىن اتاپ ءوتتى.
«جالپى، ارىپتەستەرىمىزبەن بىرلەسە ازىرلەپ، جۇزەگە اسىرىپ جاتقان جوبالارىمىز ءبىزدىڭ ۆەدومستۆولار اراسىنداعى ىنتىماقتاستىقتى نىعايتىپ، قازاقستان مەن رەسەيدىڭ مادەني-گۋمانيتارلىق بايلانىستارىنىڭ دامۋىنا تىكەلەي ىقپال ەتىپ جاتىر»، – دەدى ايدا بالايەۆا.
مينيسترلەر ءوزارا ىنتىماقتاستىقتى ودان ءارى دامىتۋعا باعىتتالعان كەڭ اۋقىمدى ماسەلەلەردى تالقىلادى.
«الدا كوپ جوسپار بار. بۇل جوبالاردىڭ جۇزەگە اسۋى ەكى ەلدى بۇرىنعىدان دا جاقىنداستىرىپ، مادەنيەت سالاسىنداعى ىنتىماقتاستىقتى نىعايتا تۇسەتىنىنە سەنىمدىمىن. كىشى كوميسسيا وتىرىسىنا ىنتىماقتاستىقتىڭ نەگىزگى باعىتتارىنا جاۋاپتى ارىپتەستەرىمىز جانە رەسەيدىڭ جەتەكشى مادەنيەت مەكەمەلەرىنىڭ وكىلدەرى قاتىسىپ وتىر. بۇگىنگى جيىندا سەرىكتەستىگىمىزدىڭ باستى ماسەلەلەرىن، كينو سالاسى، كىتاپحانا ءىسى جانە مادەنيەت سالاسىنداعى ءبىلىم بەرۋ باعىتتارىنداعى بىرلەسكەن شارالاردى كەڭىنەن تالقىلاۋدى ۇسىنامىز»، – دەدى ولگا ليۋبيموۆا.
تاراپتار ءوزارا ىنتىماقتاستىقتى ودان ءارى دامىتۋعا باعىتتالعان كەڭ اۋقىمدى ماسەلەلەردى تالقىلادى. ەكى ەلدىڭ مادەنيەت ۇيىمدارىنىڭ باسشىلارى بىرلەسكەن جۇمىستىڭ ناتيجەلەرىن ۇسىنىپ، الداعى باعىتتاردى ايقىندادى. جيىندا كينەماتوگرافيا، كىتاپحانا، مۋزەي ءىسى جانە مادەنيەت سالاسى قىزمەتكەرلەرىن دايارلاۋ ماسەلەلەرى كوتەرىلدى.
كىشى كوميسسيا وتىرىسى اياسىندا تەمىربەك جۇرگەنوۆ اتىنداعى قازاق ۇلتتىق ونەر اكادەمياسى مەن گيتيس رەسەيدىڭ تەاتر ونەرى ينستيتۋتى اراسىنداعى ىنتىماقتاستىقتىڭ تيىمدىلىگىن ارتتىرۋ جونىندەگى جول كارتاسىنا قول قويىلدى. قۇجاتتا اكتەرلىك شەبەرلىك، ساحنا ءتىلى، حورەوگرافيا، تەاتر مەنەدجمەنتى جانە پروديۋسەرلىك باعىتتارداعى بىرلەسكەن باستامالار قامتىلعان.
سونىمەن قاتار بۇگىن ماسكەۋدە رەسەيدەگى قازاقستاننىڭ مادەني كۇندەرى باستالدى. ەكىجاقتى كەزدەسۋ بارىسىندا ايدا بالايەۆا رەسەي فەدەراسياسىنىڭ مادەنيەت ءمينيسترى ولگا ليۋبيموۆاعا ءىس-شارالار ۇيىمداستىرۋعا جانە وتكىزۋگە قولداۋ كورسەتكەنى ءۇشىن العىس ءبىلدىردى.
